“Xalqaro reytinglarda ijobiy ko‘rsatgichlarga erishyapmiz. Lekin shu bilan birga qator nufuzli reytinglarda hali ko‘rsatgichlarimiz qoniqarli emas" — senator

O‘zbekistonning qator nufuzli xalqaro reytinglardagi, xususan, axborotlar ochiqligi indeksidagi o‘rni maqtanarli darajada emas. Bu haqda bugun, 6-iyul kuni Senat qo‘mitasi raisi Ravshanbek Alimov O‘zbekiston tashqi siyosatiga oid davra suhbatidan so‘ng jurnalistlarga bergan intervyusida ma’lum qildi, deya xabar bermoqda “Daryo” muxbiri.

Ravshanbek Alimovning aytishicha, muhim reytinglardagi ijobiy ko‘rsatgichlarga erishish uchun qonunlar ijrosini ta’minlash kerak.

“Xalqaro reytinglarda ijobiy ko‘rsatgichlarga erishyapmiz. Lekin shu bilan birga qator nufuzli reytinglarda hali ko‘rsatgichlarimiz qoniqarli emas. Masalan, axborotlarning ochiqligi indeksida. Shuningdek, biznesni tartibga soluvchi, eksportni rag‘batlantiruvchi mexanizmlar bo‘yicha indekslardagi o‘rnimiz bilan maqtana olmaymiz. Bu borada juda ko‘p amaliy ishlar qilish zarur. Birinchi navbatda, qabul qilingan qarorlarni joylardagi ijrosini ta’minlash kerak. Mazkur yo‘nalishlarda qonun va qarorlar bor. Ammo ularni ijroni ta’minlash masalasi muammo bo‘lmoqda. Shuning uchun bu ishda parlament a’zolariga yuqori mas’uliyat yuklanmoqda”, – dedi senat vakili.

Avvalroq Senat raisining birinchi o‘rinbosari Sodiq Safoyev O‘zbekiston qonunlari to‘g‘ridan to‘g‘ri amal qilmasligini aytgandi.