Toshkentda yosh bola qiynoqqa solinib massaj qilingani haqida xabar berilgan edi. Sog‘liqni saqlash vaziri Behzod Musayev bu xatti-harakatlarga munosabat bildirdi.
Uning ta‘kidlashicha, ushbu xatti-harakatlar nafaqat tibbiyot, balki insoniylik tuyg‘ulariga ham yotdir.
“Vazirlikning bu kabi holatlarga nisbatan pozitsiyasi aniq va qat’iy: biz inson hayoti va salomatligiga xavf soladigan, qadr-qimmati va sha’nini toptovchi har qanday xatti-harakatga murosasiz munosabatdamiz.
Shuning uchun ham mazkur masala yuzasidan o‘rganish natijalari va xulosalarimizni, xususan, uqalash muolajasini bajargan shaxsning tegishli ruxsatnoma, sertifikat, ijara shartnomasi, fizioterapiya yo‘nalishida diplom va malaka toifasiga ega bo‘lmay faoliyat yuritganiga doir faktlarni huquq-tartibot idoralariga taqdim etamiz. Ishonamizki, tez orada ushbu holat o‘z huquqiy bahosini oladi”, — deyiladi SSV tomonidan e’lon qilingan vazir munosabatida.
Eslatib o‘tamiz, 5-iyul kuni ijtimoiy tarmoqlarda kichik yoshli bolani jismoniy og‘ritib, tibbiyot talablariga mutlaqo mos bo‘lmagan uqalash muolajasi amalga oshirilayotgani aks etgan videolavha tarqalib, keng muhokamalarga sabab bo‘lgandi. Dastlabki o‘rganish natijalariga ko‘ra, ushbu muolajani amalga oshirgan shaxs tegishli ruxsatnoma va sertifikatga, fizioterapiya yo‘nalishida diplom va malaka toifasiga ega emasligi aniqlandi.
Izoh (0)