Toshkent shahrida 2022-yil 1-avgustdan ko‘p yillik daraxtlar va butalar joylashgan bo‘sh yer maydonlarini E-auksion elektron-onlayn tizimi orqali savdoga chiqarishni taqiqlanishi kutilmoqda. Bu haqda 4-iyul kuni jamoatchilik muhokamasi uchun e’lon qilingan prezident qarorida so‘z boradi.
Hujjatga ko‘ra, Toshkent shahrida daraxtzor, butazorlar va yashil maydonlarni kengaytirish, yashil maydonlarni sug‘orish tizimida zamonaviy suv tejovchi texnologiyalarni qo‘llagan holda dunyoning yetakchi yashil shaharlaridan biriga aylantiriladi.
2023—2026-yillarda Toshkent shahrida manzarali daraxtlar va ko‘p yillik butalarni ekish va o‘g‘itlashni ko‘zda tutuvchi ko‘kalamzorlashtirish dasturini amalga oshirish asosiy vazifa etib belgilanadi.
Shuningdek, Toshkent shahri bo‘ylab 2022—2023-yillarda atmosfera havosini ifloslanish darajasini ko‘rsatuvchi o‘lchov vositalari o‘rnatilib, ularni poytaxt hokimligi huzuridagi “Raqamli Toshkent” vaziyatlar markaziga integratsiya qilgan holda doimiy monitoring tizimini joriy etiladi.
Shahardan oqib o‘tuvchi kanallar va suv obyektlarida suvning tozaligi va ifloslanishini doimiy ravishda laboratoriya tahlillari asosida o‘rganib, “ifloslanish hududlari”ni aniqlash orqali suv tozaligini ta’minlash choralari ko‘riladi. Kichik sanoat zonalari, yoshlar sanoat zonalari va tadbirkorlik zonalari hududida hosil bo‘layotgan chiqindi suvlarni tozalash lokal stansiyalari barpo etilib, chiqindi suvlar tozalangandan so‘ng ochiq suv xavzalariga oqizilishi ta’minlanadi.
Izoh (0)