“Pul bersangiz, maqtayman. Bo‘lmasa, tanqid qilaman”. Surxondaryoda soxta jurnalist aniqlandi

Surxondaryo viloyatida o‘zini mamlakatdagi yetakchi telekanallar jurnalisti sifatida tanishtirib, tamagirlik qilib kelgan soxta jurnalist aniqlandi. Bu haqda “Yangi davr“ informatsion dasturida xabar qilindi.

Qayd etilishicha, Jarqo‘rg‘on tumanidagi tadbirkorlik subyektlaridan birining murojaatiga ko‘ra Davlat xavfsizlik xizmati, Iqtisodiy jinoyatlarga qarshi kurashish departamentining hududiy boshqarmalari tomonidan tezkor tadbir o‘tkazilgan. Unda Denov tumanidagi “Nihol studio” jurnalisti bo‘lgan ayol “agar pul bersangiz, sizni maqtayman. Bermasangiz, tanqid qilaman” deb, tadbirkorlarni qo‘rqitib yurgani aniqlangan. U maqtovga oid lavhaning har bir daqiqasini 200 ming so‘m etib belgilagan.

“Ko‘rsatuvning efir haqi uchun pul so‘raganman. Lavha ijtimoiy tarmoqlar orqali e’lon qilingan. Ish boshlaganimga 2-3 oy bo‘lib qoldi. Ma’lumotim oliy”, — degan u.

“Bundan tashqari, uning turli yo‘llar bilan pora olgani haqida ma’lumotlar bor. U tadbirkorlik subyektlari, fermer xo‘jaliklari, maktabgacha ta’lim tashkilotlari va ko‘plab idoralar faoliyatini tasvirga olib, tanqidiy lavha tayyorlagan. Ijtimoiy tarmoqlar va televideniye orqali ko‘rsatish bilan po‘pisa qilib, agar kelishilgan pul berilsa, tasvirlarni o‘chirib tashlash bilan tovlamachilik qilib yurgani aytilmoqda. Bunga yetarlicha faktlar ham bor”, — deyiladi xabarda.