Italiya hukumati 4-iyul, dushanba kuni mamlakat shimolidagi qurg‘oqchilikdan aziyat chekayotgan aksariyat viloyatlarda favqulodda vaziyat rejimini e’lon qildi, deb yozadi “Interfaks”.
Associated Press agentligi ma’lumotlariga ko‘ra, favqulodda vaziyat rejimi Emiliya-Romanya, Friuli-Venetsiya-Juliya, Lombardiya, Pyemont va Veneto kabi beshta viloyatga taalluqli bo‘ladi. Ba’zi shaharlarda, xususan, Veronada, qurg‘oqchilik tufayli hatto suvdan foydalanishga cheklovlar ham kiritildi.
Hukumatning favqulodda vaziyat rejimini joriy qilish qarori asosiy qishloq xo‘jalik hududlariga 36,5 million yevro mablag‘ yo‘naltirish imkonini beradi. AP qayd etishicha, ko‘mak hajmini vazirlar mahkamasi 4-iyul kuni kechqurun ma’qullagan.
Shu bilan birga, ta’kidlanishicha, qurg‘oqchilik janubiy va markaziy Italiya tumanlariga ham tarqalmoqda.
Iyun oxirida sohaga tegishli CIA uyushmasi Italiyada so‘nggi 70 yil ichidagi eng kuchli qurg‘oqchilik mamlakat qishloq xo‘jaligiga 3 milliard yevro miqdorida zarar yetkazishi haqida ogohlantirgan edi.
Yomg‘irlar yo‘qligi va 40 darajali jazirama bu mavsumda qishloq xo‘jaligi ekinlarining 30—40 foizini xavf ostida qoldirmoqda. Qurg‘oqchilikdan eng ko‘p Po daryosi vodiysidagi sholi dalalari zarar ko‘rmoqda, u yerda odatda rizotto pishirishda ishlatiladigan arborio navli guruch o‘stiriladi.
Ustiga-ustak, Italiyadagi eng yirik daryo va mamlakat shimolida asosiy suv manbai bo‘lgan Po daryosi yomg‘irlarsiz sayozlashib qoldi.
“Po daryosida suv sarfi odatda soniyasiga 150 ming litrni tashkil etadi, hozir esa ushbu ko‘rsatkich soniyasiga 30 ming va 60 ming litr oralig‘ida turibdi”, — dedi West Sesia irrigatsiya tashkiloti prezidenti Stefano Bondeza.
Qurg‘oqchilik oqibatlari Italiyaning eng boy shahri — Milanda kuchli sezilmoqda. Mer Juzeppe Salo shahar favvoralarini o‘chirib qo‘yishni buyurdi.
Izoh (0)