Италия ҳукумати 4 июль, душанба куни мамлакат шимолидаги қурғоқчиликдан азият чекаётган аксарият вилоятларда фавқулодда вазият режимини эълон қилди, деб ёзади «Интерфакс».
Associated Press агентлиги маълумотларига кўра, фавқулодда вазият режими Эмилия-Романья, Фриули-Венеция-Жулия, Ломбардия, Пьемонт ва Венето каби бешта вилоятга тааллуқли бўлади. Баъзи шаҳарларда, хусусан, Веронада, қурғоқчилик туфайли ҳатто сувдан фойдаланишга чекловлар ҳам киритилди.
Ҳукуматнинг фавқулодда вазият режимини жорий қилиш қарори асосий қишлоқ хўжалик ҳудудларига 36,5 миллион евро маблағ йўналтириш имконини беради. АP қайд этишича, кўмак ҳажмини вазирлар маҳкамаси 4 июль куни кечқурун маъқуллаган.
Шу билан бирга, таъкидланишича, қурғоқчилик жанубий ва марказий Италия туманларига ҳам тарқалмоқда.
Июнь охирида соҳага тегишли CIA уюшмаси Италияда сўнгги 70 йил ичидаги энг кучли қурғоқчилик мамлакат қишлоқ хўжалигига 3 миллиард евро миқдорида зарар етказиши ҳақида огоҳлантирган эди.
Ёмғирлар йўқлиги ва 40 даражали жазирама бу мавсумда қишлоқ хўжалиги экинларининг 30—40 фоизини хавф остида қолдирмоқда. Қурғоқчиликдан энг кўп По дарёси водийсидаги шоли далалари зарар кўрмоқда, у ерда одатда ризотто пиширишда ишлатиладиган арборио навли гуруч ўстирилади.
Устига-устак, Италиядаги энг йирик дарё ва мамлакат шимолида асосий сув манбаи бўлган По дарёси ёмғирларсиз саёзлашиб қолди.
«По дарёсида сув сарфи одатда сониясига 150 минг литрни ташкил этади, ҳозир эса ушбу кўрсаткич сониясига 30 минг ва 60 минг литр оралиғида турибди», — деди West Sesia ирригация ташкилоти президенти Стефано Бондеза.
Қурғоқчилик оқибатлари Италиянинг энг бой шаҳри — Миланда кучли сезилмоқда. Мэр Жузеппе Сало шаҳар фаввораларини ўчириб қўйишни буюрди.
Изоҳ (0)