Qosim-Jomart To‘qayev Yevropa Ittifoqiga Rossiya neftini Qozog‘iston neftiga almashtirishni taklif qildi

4-iyul kuni Qozog‘iston prezidenti Qosim-Jo‘mart To‘qayev va Yevropa kengashi rahbari Sharl Mishel o‘rtasida telefon muloqoti bo‘lib o‘tdi.

To‘qayev Qozog‘iston Markaziy Osiyoda birinchi bo‘lib Yevropa Ittifoqi bilan Kengaytirilgan sheriklik va hamkorlik to‘g‘risidagi bitimni imzolagani munosabatlarni yangi bosqichga olib chiqqani, Qozog‘iston eng yirik savdo sherigi bo‘lgan Yevropa Ittifoqi bilan barqaror aloqalarni rivojlantirish tarafdori ekanini ta’kidladi.

Prezident, shuningdek, Yevropa Ittifoqini muqobil transkontinental yo‘laklarni, jumladan, Transkaspiy xalqaro transport yo‘nalishini rivojlantirishda hamkorlik qilishga chaqirgan.

To‘qayev, shuningdek, dunyodagi energiya xavfsizligiga tahdidlardan o‘z xavotirini bildirgan. U Qozog‘iston jahon va Yevropa bozorlaridagi vaziyatni barqarorlashtirish uchun o‘zining uglevodorod salohiyatidan foydalanishga tayyorligini ma’lum qilgan.

Suhbat yakunida Prezident Qosim-Jo‘mart To‘qayev Sharl Mishelni Qozog‘istonga taklif qilgan.