Xitoy Xalq Respublikasi (XXR) raisi Vladimir Putinning Rossiyaga tashrif buyurish taklifini rad etgani haqidagi xabarlar haqiqatga umuman to‘g‘ri kelmaydi, deya ma’lum qildi Kreml vakili Dmitriy Peskov.
Taklif rad etilgani to‘g‘risida avvalroq Yaponiyaning Yomiuri gazetasi o‘z manbalariga tayanib xabar bergandi. Nashr ma’lumotlariga ko‘ra, Si Szinpin koronavirusga qarshi cheklovlar tufayli Rossiyaga borish qiyin bo‘lishini aytgan. Shu munosabat bilan Peskovdan XXR yetakchisi haqiqat ham rad javobi bergan-bermagani haqida so‘rashdi.
“Yo‘q, unday emas… Gap shundaki, Xitoyda muayyan koronavirus cheklovlari davom etmoqda. Bu mutlaqo normal holat… Putinda Xitoyga tashrif buyurish, Si Szinpinda esa Rossiyaga tashrif buyurish bo‘yicha amaldagi takliflar bor”, — deya javob qildi Rossiya prezidenti matbuot kotibi.
Yomiuri eslatishicha, Si Szinpin 2020-yil yanvari oxiridan buyon xorijiy mamlakatlarga bormagan. Nashr taxmin qilishicha, XXR yetakchisi 2022-yil kuzida bo‘lib o‘tadigan Xitoy Kompartiyasi qurultoyi arafasida ham ichki, ham tashqi siyosatda keskin qadamlar qo‘ymaslikka intilmoqda, ushbu qurultoyda u, katta ehtimol bilan, uchinchi moddatga qoladi. Moskvaga tashrif ham Xitoyning Rossiyaga sanksiyaviy bosimni kuchaytirayotgan AQSH va Yevropa bilan munosabatlaridagi inqirozni chuqurlashtirishi mumkin.
O‘tgan safar Putin va Si Szinpin fevral boshida, Rossiya prezidentining Pekindagi Olimpiya o‘yinlari ochilish marosimiga tashrifi chog‘ida ko‘rishgan edi. Davlat rahbarlarining muzokaralari uch soat davom etdi. Yakunda Rossiya va Xitoy qo‘shma bayonot e’lon qildi, unda XXR Rossiyaning NATOga nisbatan talabini qo‘llab-quvvatladi, Rossiya esa Tayvanning mustaqilligini tan olmaslikka va’da berdi va koronavirusning kelib chiqishi masalasi siyosiylashtirilishini qoraladi.
Rossiyaning Ukrainadagi maxsus operatsiyasi boshlanganidan keyin Xitoy G‘arbning Moskvaga qarshi sanksiyalariga qo‘shilmadi va vaziyat tinch yo‘l bilan hal qilinishini yoqlab chiqdi. Si Szinpin o‘z maslahatchilariga cheklov choralarini buzmagan holda Rossiyaga moliyaviy ko‘mak berish yo‘lini o‘ylab topishni buyurdi. Vashington esa Moskvaga moddiy yordam ajratsa, Pekinni buning oqibatlari kutishi haqida ogohlantirdi. AQSH prezidenti Jo Baydenning so‘zlariga ko‘ra, Xitoy o‘zining iqtisodiy kelajagi Rossiya bilan emas, asosan G‘arb bilan bog‘liqligini tushunishi kerak.
Avvalroq AQSH prezidenti Jo Bayden ma’muriyati Xitoyning beshta kompaniyasini Rossiya armiyasiga harbiy yordam berganlikda ayblab qora ro‘yxatga kiritgan edi.
Izoh (0)