Hujumchi Krishtianu Ronaldu “Manchester Yunayted” bazasiga qaytmadi.
4-iyul, dushanba kuni terma jamoadagi o‘yinini yakunlagan futbolchilar jamoaning mavsumoldi mashg‘ulotlariga qaytishi lozim edi. Bir necha soat oldin Sky Sport Ronaldu jamoani tark etish istagida bo‘lsa ham, mankunianliklar uni bazada kutayotganini xabar qildi.
Ammo Manchester Evening News xabariga ko‘ra, portugaliyalik bugun mashg‘ulotlarga bormagan. “Manchester Yunayted” ushbu vaziyatga quyidagicha izoh berdi: “Ronaldu bugun mashg‘ulotlarga qatnashmaydi. Uni kutmayapmiz. U oilaviy sharoiti tufayli mashg‘ulotlarga qatnasha olmasligini aytdi va biz uni tushuntirish deb qabul qildik”.
Bu ma’lumotni jurnalist Fabrisio Romano ham tasdiqladi. Shuningdek, u “qizil iblislar” Krishtianu jamoani tark etish istagi borligiga qaramasdan, uni sotib yubormoqchi emasligini ta’kidlagan.
Avvalroq “Manchester Yunayted” Krishtianu bilan uning kelajagini muhokama qilmoqchi ekanligi xabar qilingandi.
Ronaldu 2021/22-yilgi mavsum mankunianliklar safida barcha musobaqalarda 39 ta o‘yinda maydonga tushib, 24 ta gol va 3 ta golli uzatmani amalga oshirdi.
Izoh (0)