Криштиану Роналду «Манчестер Юнайтед»нинг машғулотларида иштирок этмади

Ҳужумчи Криштиану Роналду «Манчестер Юнайтед» базасига қайтмади.

4 июль, душанба куни терма жамоадаги ўйинини якунлаган футболчилар жамоанинг мавсумолди машғулотларига қайтиши лозим эди. Бир неча соат олдин Sky Sport Роналду жамоани тарк этиш истагида бўлса ҳам, манкунианликлар уни базада кутаётганини хабар қилди.

Аммо Manchester Evening News хабарига кўра, португалиялик бугун машғулотларга бормаган. «Манчестер Юнайтед» ушбу вазиятга қуйидагича изоҳ берди: «Роналду бугун машғулотларга қатнашмайди. Уни кутмаяпмиз. У оилавий шароити туфайли машғулотларга қатнаша олмаслигини айтди ва биз уни тушунтириш деб қабул қилдик».

Бу маълумотни журналист Фабрисио Романо ҳам тасдиқлади. Шунингдек, у «қизил иблислар» Криштиану жамоани тарк этиш истаги борлигига қарамасдан, уни сотиб юбормоқчи эмаслигини таъкидлаган.

Аввалроқ «Манчестер Юнайтед» Криштиану билан унинг келажагини муҳокама қилмоқчи эканлиги хабар қилинганди.

Роналду 2021/22 йилги мавсум манкунианликлар сафида барча мусобақаларда 39 та ўйинда майдонга тушиб, 24 та гол ва 3 та голли узатмани амалга оширди.