Finlyandiya prezidenti Sauli Niinistyo rossiyalik hamkasbi Vladimir Putin bilan boshqa xokkey o‘ynamaydi, bu haqda u Italiyaning La Reppublica gazetasiga bergan intervyusida ma’lum qildi, deb yozadi “RBK”.
“Yo‘q, men Putin bilan boshqa o‘ynamagan bo‘lardim”, — dedi u jurnalistning tegishli savoliga javoban.
Rossiya prezidenti xokkey ishqibozi sifatida tanilgan, u siyosatchilar bilan o‘yinlarda tez-tez qatnashib turadi. Masalan, o‘tgan yilning mayida u Sochida Tungi xokkey ligasi Butunrossiya festivalining gala-matchida qatnashgan edi. Havaskor jamoalarning ushbu festivali davlat rahbarining tashabbusi bilan 2011-yilda tashkil qilingan. 2021-yil dekabrida Putin bilan Belarus prezidenti Aleksandr Lukashenko xokkey o‘ynadi. Bu ularning birgalikdagi birinchi musobaqasi emasdi.
2012-yilda muzokaralardan keyin Niinistyo va Putin Leningrad viloyatida Rossiya va Finlyandiya jamoalari o‘rtasidagi xokkey musobaqasida qatnashgandi. O‘shanda Finlyandiya prezidenti Rossiya jamoasining qizil formasini kiyib o‘ynashga qaror qilgandi.
Finlyandiya prezidentining italyan gazetasiga bergan intervyusi mamlakatning NATOga qo‘shilishiga bag‘ishlandi.
May oyida Shvetsiya va Finlyandiya NATOga a’zo bo‘lish uchun ariza topshirgan. Bu davlatlar rasmiylarining qarori Ukrainada Rossiya bosqini boshlanganidan keyin xavfsizlik sohasidagi o‘zgarishlar bilan izohlangan. Ular ushbu qaror Rossiyaga qarshi qaratilmaganini va faqat o‘z xavfsizligini ta’minlash maqsadida qabul qilinganini ta’kidladi.
28-iyun kuni kechqurun Turkiya Shvetsiya va Finlyandiyani NATOga taklif qilish bo‘yicha e’tirozini qaytarib olgani ma’lum bo‘ldi. Shundan keyin Finlyandiya va Shvetsiya NATOga a‘zo bo‘lish taklifini oldi.
Turkiya shu paytgacha Shvetsiya va Finlyandiyaning NATOga qo‘shilishiga to‘sqinlik qilib kelayotgan edi. Anqara ushbu mamlakatlardan o‘zi terrorchilik tashkiloti deb hisoblaydigan Kurdiston ishchilar partiyasi a’zolarining topshirilishini, u bilan bog‘liq baqrcha tashkilotlar yopilishini, shuningdek, bu borada kafolatlar berilishini talab qilgandi.
Stoltenberg Turkiyaning terrorizmning qo‘llab-quvvatlanishi borasidagi xavotirlarini o‘rinli deb atagandi.
Bu orada NATOga a’zo davlatlar rahbarlari Madriddagi sammitda alyansning yangi strategik konsepsiyasini ma’qulladi. Rossiya yangi konsepsiyada alyans xavfsizligiga “eng asosiy va bevosita tahdid” sifatida belgilangan.
Putin esa Rossiya Finlyandiya va Shvetsiyaning NATOga qo‘shilishi xavotirda emasligi, biroq ushbu mamlakatlarga alyans harbiy infratuzilmasi joylashtirilishiga xuddi shunday yo‘l bilan javob qilishini aytdi.
Izoh (0)