Rossiya Finlyandiya va Shvetsiyaning NATOga qo‘shilishi xavotirda emas, biroq ushbu mamlakatlarga alyans harbiy infratuzilmasi joylashtirilishiga xuddi shunday yo‘l bilan javob qiladi. Bu haqda mamlakat prezidenti Vladimir Putin oltinchi Kaspiy sammiti yakunida aytib o‘tdi, deb yozadi “RBK”.
“Finlyandiya va Shvetsiyaning NATOga a’zoligi nuqtai nazaridan bizni tashvishga soladigan hech narsa yo‘q. Ular shuni xohlayaptimi — marhamat. Faqat ular shuni aniq bilib olsinki, avval ular uchun hech qanday tahdid bo‘lmagan bo‘lsa, endi u yerga harbiy kontingent va infratuzilma joylashtirilgan taqdirda, biz xuddi shu tarzda javob qaytarishga va bizga xavf solayotgan hududlar uchun xuddi shunday tahdidlar yaratishga majbur qolamiz”, — dedi davlat rahbari.
Ayni vaqtda prezident qayd etishicha, G‘arb mamlakatlarining Ukrainani Rossiya bilan muzokaralardan bosh tortishga da’vatlari bularning barchasi birlashgan G‘arbning imperiyaga oid orzu-havaslariga erishish uchun qilinayotganini tasdiqlaydi. “Bu o‘zlarining shaxsiy manfaatlarini himoya qilish vositasi. Ya’ni ukrainlar, ukrain xalqi qo‘llari bilan natochilar va NATOning yetakchi mamlakatlari shunchaki qo‘shimcha ravishda o‘z-o‘ziga ishonch hosil qilmoqchi, o‘zining dunyodagi rolini tasdiqlamoqchi, yetakchilikni emas, balki o‘z gegemonizmini, o‘zining imperiyalik orzu-havaslarini tasdiqlamoqchi”, — deya aniqlik kiritdi u.
28-iyun kuni kechqurun Turkiya Shvetsiya va Finlyandiyani NATOga taklif qilish bo‘yicha e’tirozini qaytarib olgani ma’lum bo‘ldi. Shundan keyin Finlyandiya va Shvetsiya NATOga a‘zo bo‘lish taklifini oldi.
Turkiya shu paytgacha Shvetsiya va Finlyandiyaning NATOga qo‘shilishiga to‘sqinlik qilib kelayotgan edi. Anqara ushbu mamlakatlardan o‘zi terrorchilik tashkiloti deb hisoblaydigan Kurdiston ishchilar partiyasi a’zolarining topshirilishini, u bilan bog‘liq baqrcha tashkilotlar yopilishini, shuningdek, bu borada kafolatlar berilishini talab qilgandi.
Stoltenberg Turkiyaning terrorizmning qo‘llab-quvvatlanishi borasidagi xavotirlarini o‘rinli deb atagandi.
Bu orada NATOga a’zo davlatlar rahbarlari Madriddagi sammitda alyansning yangi strategik konsepsiyasini ma’qulladi. Rossiya yangi konsepsiyada alyans xavfsizligiga “eng asosiy va bevosita tahdid” sifatida belgilangan.
Izoh (0)