So‘nggi bir oy ichida koronavirusga chalinish holatlari Yevropada uch marta ko‘paydi, bu haqda Jahon sog‘liqni saqlash tashkiloti (JSST)ning Yevropa mintaqaviy byurosi direktori Xans Klyuge ma’lum qildi, deb yozadi “Kommersant”. JSST shu yozda Yevropa mamlakatlarida COVID-19 bilan kasallanish darajasi yuqori bo‘lishini kutmoqda.
Tashkilot ma’lumotlariga ko‘ra, hozir Yevropa mintaqasidagi 53 ta mamlakatda har kuni qariyb 500 mingta koronavirusga chalinish holati qayd etilmoqda. Kunlik o‘limlar esa 2020-yil yozidagi darajada turibdi — har kuni 500 ga yaqin odam vafot etmoqda.
“Yevropa mamlakatlari avval amal qilib kelgan cheklovlarni bekor qilgani sababli, yozda virusning tarqalish darajasi yuqori bo‘ladi. Virus mamlakatlar kuzatuv olib bormayotgani uchungina yo‘qolib ketmaydi. U hali ham tarqalyapti, hali ham o‘zgaryapti va hali ham odamlarni hayotdan olib ketyapti”, — dedi Klyuge APF nashriga bergan intervyusida.
JSST COVID-19 ning oldini olish bo‘yicha o‘z tavsiyalarini kuchda qoldirmoqda: tashkilot o‘z vaqtida emlanib, jamoat joylarida niqob taqishga, kasallik alomatlarini sezgan odamlarni esa o‘z-o‘zini yakkalashga chaqirdi. “Aholining yuqori immunitetga egaligi va keksa odamlar uchun kasallanish xavfini kamaytirishga qaratilgan choralar bu yozda o‘limlar oldini olishdagi bosh omillar hisoblanadi”, — dedi Xans Klyuge.
Avvalroq JSST bosh direktori Tedros Adxanom Gebreyesus dunyo yangi pandemiyaga tayyor emasligini aytgan edi. JSST bosh direktori, shuningdek, COVID-19 bilan kurashish bo‘yicha tavsiyalarni to‘liq amalga oshirish muhimligini ta’kidladi.
Izoh (0)