Shvetsiya va Finlyandiya Anqara terrorchilik tashkilotlari deb hisoblaydigan guruhlarni qonunan taqiqlamasa, Turkiya ularning NATOga a’zoligini ma’qullamaydi, deb yozadi “Kommersant”. Prezident Rajab Toyyib Erdo‘g‘on ta’kidlashicha, Shvetsiya Kurdiston ishchilar partiyasining 73 a’zosi ekstraditsiya qilinishiga kafolat berib bo‘lgan.
“Agar Skandinaviya mamlakatlari arizasi Turkiya parlamenti tomonidan ma’qullanmasa, NATOga qabul qilinish jarayoni yakuniga yetmaydi. Shuning uchun Finlyandiya va Shvetsiya majburiyatlarini bajarishi kerak. Bu mamlakatlar Kurdiston ishchilar partiyasi, ‘Xalq o‘z-o‘zini mudofaa qilish otryadlari’ va ‘Fatxullachilar terrorchilik tashkiloti’ terrorchilari uchun o‘z eshiklarini yopishi kerak. Zarur o‘zgartirishlar milliy qonunchiliklarga kiritilishi kerak. Agar bu gaplar bajarilmasa, unda xafa bo‘lib o‘tirishmasin. Biz tegishli choralarni ko‘ramiz”, — dedi Erdo‘g‘on NATO sammiti yakunlari bo‘yicha matbuot anjumanida.
Turkiya prezidenti o‘zining terrorchilik tashkilotlari borasidagi pozitsiyasini “qizil chiziq” deb atadi. Uning fikricha, Shvetsiya va Finlyandiya bilan uch tomonlama deklaratsiya “Turkiya va turk xalqining murakkab muzokaralar jarayoni yakunida erishgan diplomatik g‘alabasi” hisoblanadi.
28-iyun kuni kechqurun Turkiya Shvetsiya va Finlyandiyani NATOga taklif qilish bo‘yicha e’tirozini qaytarib olgani ma’lum bo‘ldi. Shundan keyin Finlyandiya va Shvetsiya NATOga a‘zo bo‘lish taklifini oldi.
Turkiya shu paytgacha Shvetsiya va Finlyandiyaning NATOga qo‘shilishiga to‘sqinlik qilib kelayotgan edi. Anqara ushbu mamlakatlardan o‘zi terrorchilik tashkiloti deb hisoblaydigan Kurdiston ishchilar partiyasi a’zolarining topshirilishini, u bilan bog‘liq baqrcha tashkilotlar yopilishini, shuningdek, bu borada kafolatlar berilishini talab qilgandi.
Stoltenberg Turkiyaning terrorizmning qo‘llab-quvvatlanishi borasidagi xavotirlarini o‘rinli deb atagandi.
Bu orada NATOga a’zo davlatlar rahbarlari Madriddagi sammitda alyansning yangi strategik konsepsiyasini ma’qulladi. Rossiya yangi konsepsiyada alyans xavfsizligiga “eng asosiy va bevosita tahdid” sifatida belgilangan.
Putin esa Rossiya Finlyandiya va Shvetsiyaning NATOga qo‘shilishi xavotirda emasligi, biroq ushbu mamlakatlarga alyans harbiy infratuzilmasi joylashtirilishiga xuddi shunday yo‘l bilan javob qilishi haqida ogohlantirdi.
Izoh (0)