Turkiyada maymunchechak bilan kasallanishning birinchi holati tasdiqlandi. Bu haqda mamlakat sog‘liqni saqlash vaziri Fahreddin Kojaga tayanib, “RBK” xabar berdi.
“Bemorlarimizdan birida maymunchechak aniqlandi. 37 yoshli bemorda immun tizimi tanqisligi bor. U izolyatsiya qilingan. Dinamik kuzatuv o‘tkazildi, boshqa odamlarda kasallik aniqlanmadi,” — deya yozgan Koja Twitter’da. U kasallik havo tomchilari bilan emas, balki yaqin jismoniy kontakt orqali yuqishini ta’kidlagan.
Koja kasallik Turkiyaning qaysi shahrida qayd etilganiga aniqlik kiritmadi.
Maymunchechak Afrikadan tashqarida shu yilning may oyida tarqala boshladi. Buyuk Britaniya kasallanish holatlari haqida birinchi bo‘lib xabar berdi. Virus Nigeriyadan kelgan samolyot yo‘lovchisida topilgan. Keyinchalik, boshqa mamlakatlar, jumladan, Avstraliya, Belgiya, Kanada, AQSH, Gruziya, Janubiy Koreya va boshqalar maymunchechak haqida xabar berdi.
JSST maymunchechakning ushbu epidemiyasini xalqaro ahamiyatga molik favqulodda hodisasi emas, degan xulosaga keldi. Tashkilot ma’lumotlariga ko‘ra, yil boshidan 22-iyungacha dunyoning 50 ta davlatida 3413 kishida maymunchechak qayd etilgan.
Izoh (0)