Filippin hukumati Rappler nashrini yopishga qaror qildi. Uni tinchlik bo‘yicha Nobel mukofotini olgan Mariya Ressa boshqaradi

Filippin Qimmatli qog‘ozlar bozori bo‘yicha komissiyasi Rappler nashrini yopishni buyurdi. Bu haqda nashr hammuassisi va rahbari, tinchlik bo‘yicha Nobel mukofoti laureati Mariya Ressa ma’lum qildi, deb xabar beradi CNN Philippines.

Ressaning qo‘shimcha qilishicha, Rappler faoliyatini tugatmoqchi emas va hokimiyat qarori ustidan shikoyat qiladi.

Filippin Qimmatli qog‘ozlar bozori komissiyasi Rappler’ning ro‘yxatga olish guvohnomasini bekor qilish to‘g‘risidagi 2018-yildagi qarorini tasdiqladi. Bunday qarorga nashr 2015-yilda amerikalik tadbirkor, eBay asoschisi Per Omidyar kompaniyasidan sarmoya olgani sabab bo‘lgan edi.

Filippin qonunlariga ko‘ra, chet elliklar mahalliy OAVga egalik qila olmaydi. Ammo Rappler’ning ta’kidlashicha, Qimmatli qog‘ozlar bozori komissiyasi 2015-yilda kelishuvni ma’qullagan, Omidyar esa nashr ustidan nazorat o‘rnatmagan. Bundan tashqari, 2018-yilda kelishuv bo‘yicha savollar paydo bo‘lgach, sarmoyador sotib olgan Rappler qimmatli qog‘ozlarini nashr jamoasiga o‘tkazgan.

Rappler’ni yopish qarori Filippin prezidenti Rodrigo Dutertening vakolat muddati tugashiga bir kun qolganida qabul qilindi. 30-iyun kuni Dutertening ittifoqchisi va may oyida bo‘lib o‘tgan saylovlarda g‘alaba qozongan kichik Ferdinand Markos rasman prezident bo‘ladi — u Filippin diktatori Ferdinand Markosning o‘g‘li.

Rappler veb-sayti 2012-yilda tashkil etilgan va Filippin hukumati siyosatini, xususan, Rodrigo Dutertening giyohvand moddalarga qarshi e’lon qilgan urushini, uning doirasida ko‘plab suddan tashqari qatllarni tanqid qilgan. Filippinda Mariya Ressa internetda tuhmat qilganlikda ayblangan.

2021-yilda Mariya Ressa rossiyalik jurnalist va “Novaya gazeta” bosh muharriri Dmitriy Muratov bilan Tinchlik bo‘yicha Nobel mukofotiga sazovor bo‘ldi. 2022-yil mart oyida “Novaya gazeta” Ukraina bilan urush boshlanishi munosabati bilan rasmiylarning bosimi tufayli o‘z faoliyatini to‘xtatdi.

Iyun oyida Dmitriy Muratov Nobel medalini kimoshdi savdosida 103,5 million dollarga sotdi. Yig‘ilgan mablag‘ YUNISEFga ukrainalik bolalarga yordam berish uchun o‘tkaziladi.