Францияда 2015 йил 13 ноябрь куни Парижда содир этилган ҳужумларда қатнашган террорчиларга ҳукм чиқарилди, деб ёзади «РБК». Ўшанда «Стад де Франс» стадиони яқинида портлаш юз берган, бир нечта ресторанлар хўрандалари отиб ташланган ва «Батаклан» концерт залида қирғин бўлган эди.
Жами 20 нафар террорчи судланди. Уларнинг баъзилари умрбод қамоқ жазоси олди, булар терактлар ташкилотчиси деб гумонланаётган Салоҳ Абдислом, шунингдек, Муҳаммад Абриний, Фабян Клен, Жан-Мишел Клен, Аҳмад Алҳалд, Усама Атар ва Обейда Ареф Дибо. Улардан айримлари, масалан, Абдислом қамоқда муддатсиз қолади, бошқалар учун эса «хавфсизлик муддати» белгиланди, шу вақт тугаганидан кейин улар шартли равишда муддатидан олдин озодликка чиқа олади, — мисол учун, Абриний учун бундай муддат 22 йилга тенг.
Қолганлар икки йилдан 30 йилгача озодликдан маҳрум этилишга ҳукм қилинди. Энг кўп муддатни (30 йил) Аҳмад Даҳмоний, Софиен Аярий, Муҳаммад Баққолий ва Усама Крайем олди. Адел Хаддади ва Муҳаммад Усмон 18 йилга, Али ал Хаддад Асуфий — 10 йилга, Муҳаммад Амрий ва Ясин Атар — 8 йилга, Али Улкадий — беш йилга (уч йили шартли), Ҳамза Ату ва Абдулла Шуаа — тўрт йилга (икки йили шартли) ҳамда Фарид Хархач икки йилга озодликдан маҳрум этилди.
Маҳкумлар ўн кун ичида ҳукм устидан шикоят аризаси бериши мумкин.
Париждаги терактлар 2015 йил 13-дан 14 ноябрга ўтар кечаси шаҳарда ва шаҳар ташқариси Сен-Денидаги олтита турли нуқтада кичик вақт оралиқлари билан содир бўлганди. Уч нафар террорчи Франция ва Германия терма жамоалари ўртасида футбол мусобақаси бўлиб ўтаётган «Стад де Франс» стандиони яқинида худкушлик камарини портлатиб юборган. Бошқа бир гуруҳ Париж шарқидаги кафе ва ресторанларга ҳужум қилган. Яна уч киши «Батаклан» концерт залида одамларни гаровга олган. Терактлар оқибатида жами 130 киши ҳалок бўлиб, 350 дан ортиқ одам яраланган эди.
Воқеалар учун жавобгарликни ИШИД ўз бўйнига олди. Терактлардан кейин мамлакатда фавқулодда ҳолат режими эълон қилиниб, у бир неча марта узайтирилганди.
Терактлар ташкилотчиси деб гумон қилинаётган Салоҳ Абдислом 2016 йил мартида Брюсселда қўлга олинган ва Францияга келтирилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)