28—29-iyun kunlari Turkmanistonning Axal viloyati Oqbug‘doy tumanidagi Oq o‘tov binosida xorij estradasi yulduzlari ishtirokida konsertlar bo‘lib o‘tadi, deb yozadi “Xronika Turkmenistana”.
29-iyun kuni sobiq prezident Gurbanguli Berdimuhamedov 65 yoshga to‘ladi. Avvalroq, shu munosabat bilan poytaxtda “Toshkent” bog‘i ochilishi va katta konsert o‘tkazilishi xabar qilingan edi. 28-iyun kuni poytaxtda Kaspiybo‘yi davlatlari tashqi ishlar vazirlari majlisi o‘tkazilishi, 29-iyun kuni esa Kaspiybo‘yi davlatlari rahbarlarining oltinchi sammiti bo‘lib o‘tishi tufayli, tadbirlar Ashxobodda o‘tkazilmayapti.
Taniqli chet ellik qo‘shiqchilar orasida reper Akon, Dr. Alban, rossiyalik pop-duet Artik&Asti va rossiyalik xonanda Emin Agalarov bor. Shuningdek, turkiyalik Demet Akalin, tunislik Amani Suissi va BAAdan kelgan qo‘shiqchi Balkis Ahmed Fathiy ham chiqish qiladi.
Nashr eslatishicha, 2013-yilda prezident Gurbanguli Berdimuhamedovning tavallud ayyomi munosabati bilan tashkillashtirilgan konsertda pop-yulduz Jennifer Lopes qatnashib, buning uchun 1,5 million dollar gonorar olgan edi. Keyinroq xonanda ushbu konsertda ishtirok etib xato qilganini tan olgandi. Lopes Turkmanistonda konsert berishi ma’lum bo‘lgach, chet eldagi ko‘plab huquq himoyachilari uning bu ishini keskin qoralagan edi. Human Rights Watch tashkiloti vakillari o‘shanda Lopes xonim “qaysi diktatorlar qarshisida kuylashni tanlash erkinligiga ega ekanini, ammo bu uning obro‘siga ta’sir qilmay qolmaydi deb o‘ylamasligi kerak”ligini aytgandi.
Izoh (0)