Britaniyaning The Economist nashri oziq-ovqat va yonilg‘i qimmatlashuvi tufayli, yaqin 12 oy ichida tartibsizliklar yuzaga kelishi ehtimoli katta bo‘lgan to‘qqizta mamlakatni ma’lum qildi. Ijtimoiy-siyosiy o‘zgarishlar yuz berishi uchun da’vogar mamlakatlar orasiga Markaziy Osiyodagi bir yo‘la ikkita davlat kiritildi, bular Qirg‘iziston va Turkmanistondir.
Maqolada pandemiya va Rossiya-Ukraina harbiy nizosi oqibatida dunyoda yuzaga kelgan oziq-ovqat va energiya xavfsizligi bilan bog‘liq muammolar ko‘rib chiqiladi.
Qirg‘iziston yaqin bir yil mobaynida tartibsizliklar kutiladigan mamlakatlar ro‘yxatiga kiritildi. Prognoz darajasini ekspertlar yuqori deb baholamoqda.
Aholisi uchun o‘z huquq va erkinliklarini talab qilish odatiy ish bo‘lgan Qirg‘izistondan tashqari, ro‘yxatga kutilmaganda Turkmaniston kiritildi, u yerda esa fuqarolar, odatda hayotning barcha mashaqqatlariga chidab keladi.
Shuningdek, ijtimoiy-siyosiy inqiroz Pokiston, Turkiya, Peru va Afrikadagi to‘rtta mamlakat — Misr, Tunis, Uganda, JARda sodir bo‘lishi mumkin.
Maqola muallifi qayd etishicha, Qirg‘izistonda davlat mustaqilligining 30 yili davomida uch nafar prezident hokimiyatdan ag‘darilgan.
Katta qismi Rossiyadan yetkaziladigan oziq-ovqat va yonilg‘i narxining oshishi tartibsizliklarga olib kelishi mumkin, deb taxmin qilinmoqda.
Umuman olganda, Qirg‘izistonning Rossiyaga ko‘p jihatdan bog‘liqligi qayd etilmoqda, shu jumladan, muhojirlar o‘z vataniga yuboradigan pul o‘tkazmalari sohasida ham.
Turkmanistonga kelganda, iqtisodiy boshqaruvning samarasizligi tufayli, bu mamlakatda anchadan buyon oziq-ovqat tanqisligi kuzatilayotgani, muayyan cheklovlar o‘rnatilgani aytildi.
Ta’kidlanishicha, agar, masalan, kimdir belgilanganidan ko‘ra ko‘proq non sotib olgan bo‘lsa, 15 sutkaga qamalishi mumkin.
Biroq maqola muallifi turkman xalqi joriy inqirozni itoatkorlik bilan o‘tkazmasligidan darak beruvchi hech qanday fakt va dalillar keltirmadi.
Izoh (0)