“Tolibon” harakati Afg‘onistonda qo‘zg‘olon uyushtirishidan xavfsirab, o‘zining o‘zbek qo‘mondonlarini uy qamog‘iga joylashtirdi, deb yozadi “Interfaks”.
Faryob viloyatida toliblar o‘zbek qo‘mondonlaridan biri Hojiga haj safariga borishga ruxsat bermadi, u uy qamog‘iga yuborildi. Hasht-e Subh gazetasiga mahalliy manbalar ma’lum qilishicha, toliblarning razvedka xizmati va mudofaa vazirligi bir oy mobaynida Faryobdagi o‘zbek qo‘mondonlarining harakatlanishini kuzatib borgan.
Ta’kidlanishicha, “Tolibon”ning o‘zbek qo‘mondonlari maxdum A’lam Rabboniy, Qori Salohiddin Ayubiy va komandir To‘fon pushtun toliblarga qarshi isyon ko‘tarishi mumkinligidan xavfsirab, uy qamog‘iga yuborilgan.
Pushtun va pushtun bo‘lmagan toliblar qo‘mondonlari o‘rtasidagi ziddiyatlar mamlakat shimolida so‘nggi ikki oy ichida kuchaydi.
Avvalroq “Tolibon” harakati 28-iyun kuni Saripul viloyatida hazorlar qo‘mondoni Mavlaviy Mahdiy isyoni bostirilganini e’lon qilgan edi.
“Saripul viloyati gubernatori Muhammad Yoqub Abdul Rahmon Aka bugun xavfsizlik bilan bog‘liq vaziyatni baholash uchun viloyatning Balxob tumaniga tashrif buyurdi. Gubernatorning xabar berishicha, Balxobda odamlarni ta’qib qilgan bir qancha isyonchilar qo‘lga olingan, xavfsizlik tiklangan va odamlar to‘liq xavfsizlikda yashayapti”. Bu haqda “Tolibon” nazorat qilayotgan Afg‘onistondagi yagona davlat axborot agentligi bo‘lmish Bakhtar nashri yozgan.
Shu bilan birga, Mavlaviy Mahdiyning o‘zi mag‘lubiyatni tan olgani yo‘q.
Toliblarning Balxobga bostirib kirishi va tinch aholi orasidagi qurbonlar haqidagi xabarlarning e’lon qilinishi xalqaro maydonda norozilikni keltirib chiqardi. Amnesty International bu hududda oddiy fuqarolarning qatl qilinishidan xavotirda ekanini bildirib, dunyo Afg‘onistonda inson huquqlari buzilishini e’tiborsiz qoldirmasligi kerakligini aytdi.
BMT maxsus ma’ruzachisi Richard Bennett ham toliblarning vahshiyona harakatlaridan tashvishda ekanini ma’lum qilgandi. 27-iyun, dushanba kuni u Balxob viloyatida noqonuniy qotilliklar, majburiy ko‘chirishlar, mol-mulkning yo‘q qilinishi va boshqa qonun buzilishlari haqidagi xabarlar xavotir uyg‘otishini yozgandi. Bennettning so‘zlariga ko‘ra, internet va telekommunikatsiya tarmoqlari o‘chirib qo‘yilgani tufayli, bu xabarlarni tekshirish qiyin. Shunga qaramay, u tomonlarni xalqaro gumanitar huquqqa rioya qilishga chaqirdi.
Izoh (0)