Turkmaniston prezidenti Gurbanguli Berdimuhamedov “Go‘ktepa” masjidida payg‘ambar yoshiga to‘lishi munosabati bilan odamlarga ehson ulashdi. Turkmanistondagi an’analarga ko‘ra “Oq qo‘chqor bayrami” (“Ak goyun toyi”) nishonlandi. Bu haqda “Turkmaniston” internet gazetasi xabar qilgan.
Foto: Turkmenportal
Berdimuhamedov masjidga kelish chog‘ida oqsoqollar bilan suhbatlashgan, ular prezidentni tavallud kuni bilan tabriklab, mustahkam sog‘liq, uzoq umr va faoliyatida muvaffaqiyatlar tilagan. Turkmaniston prezidenti urf-odatni ado etishdan avval qisqa nutq so‘zlagan.
“63 yosh payg‘ambar yoshi bo‘lgani uchun xalq orasida milliy qadriyatga aylangan. Turkman xalqi esa bu davrga o‘zgacha ahamiyat bilan qaraydi. Turli sinovlardan o‘tib ushbu yoshgacha yetib kelgan har bir inson yaxshini yomondan ajrata olishni o‘rganadi. G‘am va quvonchni anglab yetgan, hayotiy tajribaga ega inson boshqalar uchun ham o‘rnak bo‘la oladi”, – degan Gurbanguli Berdimuhamedov.
Shuningdek, Turkmaniston davlat rahbari tadbirda ishtirok etganlarga mamlakatda aholining turmush sharoitini yaxshilash borasida amalga oshirilayotgan ishlar haqida ham gapirgan. Nutqdan keyin masjidda oq qo‘chqorni so‘yish marosimi o‘tkazildi.
Mavzuga doir: Shavkat Mirziyoyev 63 yoshga to‘lgan Gurbanguli Berdimuhamedovni tug‘ilgan kuni bilan tabrikladi
29-iyun kuni oqshomda Ashxoboddagi maydonda Gurbanguli Berdimuhamedovning tug‘ilgan kuni munosabati bilan bayram konserti o‘tkazilgan.
