28—29 июнь кунлари Туркманистоннинг Ахал вилояти Оқбуғдой туманидаги Оқ ўтов биносида хориж эстрадаси юлдузлари иштирокида концертлар бўлиб ўтади, деб ёзади «Хроника Туркменистана».
29 июнь куни собиқ президент Гурбангули Бердимуҳамедов 65 ёшга тўлади. Аввалроқ, шу муносабат билан пойтахтда «Тошкент» боғи очилиши ва катта концерт ўтказилиши хабар қилинган эди. 28 июнь куни пойтахтда Каспийбўйи давлатлари ташқи ишлар вазирлари мажлиси ўтказилиши, 29 июнь куни эса Каспийбўйи давлатлари раҳбарларининг олтинчи саммити бўлиб ўтиши туфайли, тадбирлар Ашхободда ўтказилмаяпти.
Таниқли чет эллик қўшиқчилар орасида рэпер Akon, Dr. Alban, россиялик поп-дуэт Artik&Asti ва россиялик хонанда Эмин Агаларов бор. Шунингдек, туркиялик Демет Акалин, тунислик Амани Суисси ва БААдан келган қўшиқчи Балкис Аҳмед Фатҳий ҳам чиқиш қилади.
Нашр эслатишича, 2013 йилда президент Гурбангули Бердимуҳамедовнинг таваллуд айёми муносабати билан ташкиллаштирилган концертда поп-юлдуз Женнифер Лопес қатнашиб, бунинг учун 1,5 миллион доллар гонорар олган эди. Кейинроқ хонанда ушбу концертда иштирок этиб хато қилганини тан олганди. Лопес Туркманистонда концерт бериши маълум бўлгач, чет элдаги кўплаб ҳуқуқ ҳимоячилари унинг бу ишини кескин қоралаган эди. Human Rights Watch ташкилоти вакиллари ўшанда Лопес хоним «қайси диктаторлар қаршисида куйлашни танлаш эркинлигига эга эканини, аммо бу унинг обрўсига таъсир қилмай қолмайди деб ўйламаслиги керак»лигини айтганди.
Изоҳ (0)