Ukrainaning Xerson viloyati Rossiyaga qo‘shilish haqida referendum o‘tkazishga tayyorlanishni boshladi, hudud to‘laqonli subyektga aylanadi. Bu haqda harbiy-fuqarolik ma’muriyati rahbari o‘rinbosari Kirill Stremousov o‘z Telegram-kanalida ma’lum qildi, deb yozadi “RBK”.
“Biz referendumga tayyorlanyapmiz va biz uni o‘tkazamiz. Xerson viloyati qaror qabul qilib, Rossiyaga qo‘shiladi va to‘laqonli subyektga aylanadi, u shunchaki ko‘p millatli xalqlar yonma-yon yashaydigan emas, Rossiya xalqlari yagona, hamjihat, butun, bir oila kabi yashaydigan yagona davlat bo‘la oladi”, — dedi Stremousov.
Rossiya harbiylari Ukrainaning Xerson viloyatini nazorat ostiga olgani haqida Rossiya Mudofaa vazirligi mart o‘rtalarida ma’lum qilgan edi. Shundan keyin viloyatda harbiy-fuqarolik ma’muriyati tuzildi, Rossiya telekanallari uzatila boshladi, grivna bilan bir qatorda rubl muomalaga kiritildi, yirik Rossiya banklari ochilishi e’lon qilindi va Rossiya pasportlarini beradigan markazlar tashkil qilina boshladi.
Harbiy-fuqarolik ma’muriyati vakillari Xerson viloyatining Rossiya tarkibiga kirishini yoqlab bir necha marta chiqish qilgan. Stremousov viloyatda kuzda referendum o‘tkazilishini aytgandi.
Rossiya bosh vaziri o‘rinbosari Marat Xusnullin Xerson viloyati haqida gapirayotib, u “Rossiya oilasida katta istiqbol va munosib o‘rin”ga ega ekanini aytgandi. Prezident matbuot kotibi Dmitriy Peskov Rossiyaga qo‘shilish haqida referendum o‘tkazish shartlari sifatida Ukraina hududlarining xavfsizlikni ta’minlashi va mahalliy aholining istagini aytib o‘tgandi.
Eslatib o‘tamiz, avvalroq Ukrainaning Xerson shahriga rahbarlik qilib kelgan Igor Kolixayev qo‘lga olingani haqida Xerson viloyatining harbiy-fuqarolik ma’muriyati rahbari o‘rinbosari Kirill Stremousov ma’lum qilgandi.
Izoh (0)