Germaniyada sud 101 yoshli Yozef Shyutsni besh yillik qamoqqa hukm qildi, deb yozadi Meduza. Brandenburg sudi uni 1942—1945-yillarda yuz bergan qotilliklarga aralashishda aybdor deb topdi, o‘shanda 21 yoshli Shyuts Oraniyenburgdagi Zaksenxauzen konslagerida qo‘riqchi bo‘lib ishlagan.
DW yozishicha, Shyuts Xolokost davrida amalga oshirilgan jinoyatlar uchun sud oldida javob bergan va aybdor deb topilgan eng keksa odamga aylandi.
Prokuratura Shyutsni lagerdagi uch yarim mingdan ortiq mahbusning qatl qilinishiga, sovet harbiy asirlarining otib o‘ldirilishiga va mahbuslarning zaharlovchi gaz yordamida o‘ldirilishiga aloqadorlikda aybladi. Prokuratura fikricha, Shyuts qotilliklarda “ongli ravishda va o‘z ixtiyori bilan” qatnashgan.
Sudlanuvchi 2021-yil qishidan buyon davom etib kelgan sud jarayoni mobaynida o‘z aybini rad etdi va lager hududida sodir etilgan ommaviy qotilliklardan xabardor bo‘lmaganini aytdi.
Eng past bo‘g‘indagi natsistlarni jinoiy ta’qib qilishni Germaniya hukumati taxminan 10 yil avval boshlagan edi, o‘shanda SS nazoratchisi Ivan Demyanyukka qarshi ish qotillikka oid bevosita dalillarsiz, balki natsistlar rejimiga sheriklik qilgani va aloqador bo‘lgani uchun xolokostda ishtirok etganlik bo‘yicha ayblov hukmini chiqarish imkonini beruvchi yuridik pretsedentni yaratgan edi. Demyanyuk — Sobibor konslageri sobiq qo‘riqchisi — 2011-yilda 28 mingdan ziyod odamning qatl qilinishida qatnashganlikda aybdor deb topilgandi. Bu sud Ishida bosh dalil Demyanyukka tegishli SS guvohnomasi bo‘ldi, u yerda xizmat o‘tash joyi sifatida Sobibor ko‘rsatilgandi.
2015-yilda “Osvensim” hisobchisi Oskar Gryoning kamida 300 ming mahbusning o‘ldirilishiga aloqaodrlikda ayblanib ikki yilga hukm qilingandi. 2017-yilda Osvensim sobiq qo‘riqchisi Raynxold Xanning 170 mingdan ziyod odamning o‘ldirilishida qatnashgani uchun besh yilga hukm qilindi. 2020-yilda Shuttgof konslageri sobiq qo‘riqchisi Bruno Dey besh mingdan ortiq kishining o‘ldirilishiga ko‘maklashgani uchun shartli ravishda ikki yilga ozodlikdan mahrum qilingandi. 2021-yilda sobiq kotiba Irmgard Fyurxner Shtuttgof konslagerida 11 mingdan ko‘p odamning o‘ldirilishida ishtirok etganlik uchun sud qarshisida javob berdi. Sudlanuvchilarning barchasi sud vaqtida 90 yoshdan katta bo‘lgan.
Izoh (0)