Iqtisodiyot fanlari bo‘yicha falsafa doktori Shoiraxon Nurdinova tadqiqotiga ko‘ra AQSHdagi erkinlik va qadriyatlar o‘zbek ayollarining ijtimoiy-iqtisodiy faolligi orttirgan. Bu haqda Review xabar bermoqda.
Xotin-qizlarda erkaklarga nisbatan oliy ma’lumot olishga bo‘lgan intilishning ortish tendensiyasi paydo bo‘lgan.
Shoiraxon Nurdinova o‘zining ma’ruzasida mustaqillikdan so‘ng AQSHga ko‘chib ketgan o‘zbeklar hayoti bilan bog‘liq tadqiqotining ilk natijalarini ma’lum qildi.
Turli millatga mansub immigrantlar dasturi doirasida o‘zbekistonliklarga 2017-yilda 4 095 nafar, 2018-yilda 4 612 nafar va 2019-yilda 2 550 nafar doimiy rezidentlik maqomi berilgan.
Mazkur dastur orqali kelganlar AQSHdagi o‘zbek migrantlarining asosiy qismini tashkil etib, asosan, Nyu-York shahriga joylashgan.
O‘zbek jamiyatlari yetakchilari orqali mazkur tadqiqot uchun ishtirokchilar tanlab olingan. Mazkur tadqiqotda migrantlarning hayot sifatini yoritib berish uchun intervyu metodidan foydalanilgan.
Chuqurlashtirilgan intervyular 25 dan 45 daqiqagacha davom etgan. Tadqiqotda Nyu-York shahri, Indiana va Chikago shtatlarida yashovchi 20 nafar o‘zbek migranti ishtirok etgan.
Ishtirokchilarning o‘rtacha yoshi 44,5 yoshni tashkil etib, mehnatga layoqatli aholi hisoblanadi. Ishtirokchilar 6 erkak va 14 ayolni o‘z ichiga oladi. Barcha erkak respondentlar oliy ma’lumotli yoki undan yuqori darajaga ega.
14 nafar ayoldan 4 nafari o‘rta, 1 nafari o‘rta maxsus, 9 nafari oliy ma’lumotga ega. Ishtirokchilarning 90 foizi oxirgi 2 yil ichida ish bilan band bo‘lgan. 80 foizi hozirda ish bilan band va 10 foizi oxirgi 12 oy ichida ishlagan.
AQSHdagi erkinlik va qadriyatlar natijasida o‘zbeklar ayollarning jamiyatdagi o‘rni haqidagi stereotiplarni o‘zgartirganligi kuzatildi. O‘zbekistonda uy bekasi bo‘lgan ko‘pchilik ayollar AQSHda ishlash yoki o‘qishni boshlagan.
40 yoshli sobiq uy bekasi Qo‘shma Shtatlarga ko‘chib kelganidan so‘ng, universitetda ta’lim olib, huquqshunos bo‘lganligini aytadi. Bu esa unga o‘ziga bo‘lgan ishonchni orttirgan, hayot sifati yaxshilangan.
48 yoshida AQSHga ko‘chib kelgan boshqa bir uy bekasi ingliz tilini o‘rganib, ish topa olganini o‘zining muvaffaqiyati deb biladi.
AQSHga 12 yil oldin ko‘chib kelgan erkak migrant fikriga ko‘ra, AQSHdagi o‘zbek ayollari ta’limga erkaklardan ko‘ra ko‘proq qiziqish bildiradi.
O‘zbekistonlik ayollar, asosan, tibbiyot va moliya sohasini afzal ko‘radi, — deydi ekspert.
AQSHdagi erkinlik va qadriyatlar o‘zbek ayollarining ijtimoiy-iqtisodiy faolligi orttirgan. Xotin-qizlarda erkak migrantlarga nisbatan oliy ma’lumot olishga bo‘lgan intilishning ortish tendensiyasi paydo bo‘lgan.
Qo‘shma Shtatlardagi o‘zbeklar uchun milliylikni saqlash hayotdan qoniqishga ta’sir ko‘rsatuvchi asosiy omil sifatida ko‘riladi.
Izoh (0)