Rossiya Federatsiyasiga qarashli Yoqutiston Respublikasi hukumati o‘rmon yong‘inlari bilan bog‘liq vaziyat tufayli, hududda favqulodda vaziyat rejimini e’lon qildi, deb yozadi “Interfaks”.
“Butun Yoqutiston hududida o‘rmon yong‘inlari tufayli, Favqulodda vaziyatlar bo‘yicha hududiy komissiya qarori bilan favqulodda vaziyat rejimi joriy qilindi”, — dedi Yoqutiston ekologiya vaziri o‘rinbosari Andrey Konoplyov tezkor shtab brifingida.
Avvalroq respublikada faol momaqaldiroqlar tufayli o‘rmon yong‘inlari soni bir sutkada ikki marta oshib, 60 tagacha yetgani ma’lum qilingandi.
Yoqutiston tazkor shtabi ma’lumotlariga ko‘ra, bir qator tumanlarda va Yakutsk shahridagi o‘rmonlarda xavfning yuqori IV sinf darajasi o‘rnatilgan. Qolgan hududlarda o‘rmonlardagi yong‘in xavfi III sinfdan oshmaydi.
Yoqutiston hududida shu yildagi ilk yong‘inlar may o‘rtalarida qayd etilgan edi. 2021-yilda respublikada mavsum boshidan buyon ro‘yxatga olingan yong‘inlar maydoni so‘nggi o‘n yil ichidagi rekord ko‘rsatkichdan oshdi va qariyb 8,5 million gektarga yetdi. Bu yil hududda, sinoptiklar prognoziga ko‘ra, yana jazirama yoz bo‘lishi kutilmoqda.
Izoh (0)