Россия Федерациясига қарашли Ёқутистон Республикаси ҳукумати ўрмон ёнғинлари билан боғлиқ вазият туфайли, ҳудудда фавқулодда вазият режимини эълон қилди, деб ёзади «Интерфакс».
«Бутун Ёқутистон ҳудудида ўрмон ёнғинлари туфайли, Фавқулодда вазиятлар бўйича ҳудудий комиссия қарори билан фавқулодда вазият режими жорий қилинди», — деди Ёқутистон экология вазири ўринбосари Андрей Коноплёв тезкор штаб брифингида.
Аввалроқ республикада фаол момақалдироқлар туфайли ўрмон ёнғинлари сони бир суткада икки марта ошиб, 60 тагача етгани маълум қилинганди.
Ёқутистон тазкор штаби маълумотларига кўра, бир қатор туманларда ва Якутск шаҳридаги ўрмонларда хавфнинг юқори IV синф даражаси ўрнатилган. Қолган ҳудудларда ўрмонлардаги ёнғин хавфи III синфдан ошмайди.
Ёқутистон ҳудудида шу йилдаги илк ёнғинлар май ўрталарида қайд этилган эди. 2021 йилда республикада мавсум бошидан буён рўйхатга олинган ёнғинлар майдони сўнгги ўн йил ичидаги рекорд кўрсаткичдан ошди ва қарийб 8,5 миллион гектарга етди. Бу йил ҳудудда, синоптиклар прогнозига кўра, яна жазирама ёз бўлиши кутилмоқда.
Изоҳ (0)