Eron BRIKS (Braziliya, Rossiya, Hindiston, Xitoy va JAR) guruhiga qo‘shilish uchun ariza berdi. Bu haqda Tasnim agentligi mamlakat Tashqi ishlar vazirligi rasmiy vakili Said Xatibzodaga tayanib xabar bergan.
U Eronning BRIKSga a’zo bo‘lishi har ikkala tomonga ham “qo‘shimcha qulayliklar” keltirishiga umid bildirdi. Xatibzoda qayd etishicha, BRIKS mamlakatlarining jahon YaIMdagi ulushi 30 foizni, guruhga kiruvchi davlatlar umumiy aholisining dunyo aholisiga nisbatan ulushi esa 40 foizni tashkil qiladi.
O‘tgan hafta Eron prezidenti Ibrohim Raisiy Xitoy Xalq Respublikasi raisi Si Szinpinning taklifi bilan BRIKS+ onlayn sammitida nutq so‘zlagan edi. U “Eronning geosiyosiy va geoiqtisodiy joylashuvi uni BRIKSning barqaror va ishonchli sherigiga aylantirishi mumkin”ligini aytdi.
Argentina prezidenti Alberto Fernandes ham o‘z mamlakatining birlashmaga qo‘shilish istagini bildirdi. “Biz ushbu davlatlar guruhining teng huquqli a’zosi bo‘lishga intilyapmiz… Biz xavfsiz va mas’uliyatli oziq-ovqat mahsulotlari yetkazib beruvchisi hamda biotexnologiyalar va amaliy logistika sohasining obro‘li ishtirokchisizmiz”, — degan edi u 24-iyun kuni.
Rossiya TIV rasmiy vakili Mariya Zaxarova Eron va Argentina BRIKSga qo‘shilish uchun ariza berganini tasdiqladi. “Oq uydagilar dunyoda yana nimani o‘chirib qo‘yish, taqiqlash va buzish haqida o‘ylayotgan paytda, Argentina va Eron BRIKSga a’zo bo‘lish uchun arizalar topshirdi”, — deb yozdi u Telegram’da.
Rossiya prezidenti yordamchisi Yuriy Ushakov Moskva BRIKSning ehtimoliy kengayishiga ijobiy qarashini, ammo “bu muammoga juda ehtiyotkorlik bilan, puxtalik bilan yondashish kerak”ligini aytdi. Rossiya tomoni qo‘shilish uchun nozmzodlarga jarayonlar va talablarni belgilashni taklif etmoqda, dedi u. Ushakovning fikricha, birinchi shunday formatlar topish kerakki, ular boshlang‘ich bosqichda birlashma bilan kuzatuvchilar sifatida hamkorlik qilish imkonini bersin.
BRIKS 2006-yil iyunida Peterburg iqtisodiy forumi doirasida Braziliya, Rossiya, Hindiston, Xitoy iqtisodiyot vazirlari ishtirokida tashkil topgan. 2010-yilda unga Janubiy Afrika Respublikasi qo‘shilgan.
Izoh (0)