Shveysariya federal jinoiy sudi Credit Suisse bankini Bolgariyaning kokain savdosi bilan shug‘ullangan jinoiy guruhining pul yuvishiga aloqador deb topdi, deb yozadi “RBK”.
Reuters qayd etishicha, bu bankka nisbatan mamlakatdagi birinchi jinoiy ishdir. Tergov 2004-yildan 2008-yilgacha bo‘lgan davr voqealariga taalluqli.
Sud Credit Suisse’ni 2 million Shveysariya franki (2,1 million dollar) miqdorida jarimaga tortdi, jinoiy guruh a’zolari hisoblarda saqlagan 12 million dollardan ziyod qiymatga ega aktivlarni musodara qilishni buyurdi, shuningdek, bankka Shveysariya hukumatiga tovon puli sifatida 18,6 million yevro to‘lash majburiyatini yukladi.
Pul yuvishda aybdor deb topilgan sobiq bank xodimasi 20 oyga ozodlikdan mahrum etishga va jarimaga hukm qilindi. Financial Times yozishicha, u bolgariyalik sobiq tennischi Yelena Pampulova-Bergomi bo‘lib, u Credit Suisse’da jamoatchilik bilan aloqalar bo‘yicha menejer bo‘lib ishlagan. Uning advokati ma’lum qilishicha, “asossiz va adolatsiz qaror” ustidan shikoyat kiritadi, uning mijozi esa hech qanday moliyaviy foyda olmagan.
Prokurorlarga ko‘ra, Pampulova-Bergomi o‘zining sport bilan bog‘liq o‘tmishi sharofati bilan bolgariyalik sobiq professional kurashchi Evelin Banev bilan aloqani yo‘lga qo‘ygan, u esa Bolgariyaning kokain qiroli deb ataladi. Ayol Banevning atrofidagi shaxslardan muntazam ravishda naqd pul solingan jomadonlarni qabul qilgan.
Banev 2017-yil Italiyada narkotiklar savdosi uchun, 2018-yilda Bolgariyada pul yuvganlik uchun sudlangan. 2021-yil sentabrida u Kiyevda qo‘lga olinib, hibsga joylashtirilgan, u mahalliy sudning Bolgariyaga ekstraditsiya haqidagi qarorini kutmoqda.
Izoh (0)