2022-yil boshidan buyon maymunchechak bilan kasallanish bo‘yicha 3413 ta holat laboratoriya tasdig‘ini topgan, kasallikda bitta o‘lim holati ma’lum. Bu haqda Jahon sog‘liqni saqlash tashkiloti (JSST) hisobotida qayd etilgan.
2022-yilning 1-yanvaridan 22-iyuniga qadar JSSTga 50 ta davlatdan 3413 ta kasallanish holati va bitta o‘lim haqida xabar kelib tushgan. Jumladan, 17-iyundan beri 1310 ta yangi holat qayd etilgan va yana sakkizta davlatda kasallik aniqlangan.
Laboratoriya tomonidan tasdiqlangan holatlarning aksariyati Yevropa mintaqasida qayd etilgan (jami holatlarning 86 foizi — 2933 kishi). Kasallik qayd etilgan boshqa hududlarga quyidagilar kiradi: Afrika mintaqasi (2 foiz - 73 holat), Amerika (11 foiz — 381 kishi), Sharqiy O‘rta Yer dengizi mintaqasi (bir foizdan kam — 15 kishi) va G‘arbiy Tinch okeani mintaqasi (bir foizdan kam — 11 bemor). 2022-yilning ikkinchi choragida Nigeriyada bitta o‘lim qayd etildi.
Shunga qaramay JSST Favqulodda vaziyatlar qo‘mitasi maymunchechak epidemiyasini hozirda xalqaro ahamiyatga molik bo‘lgan favqulodda holat (PHEIC) deb tan olmadi va pandemiya e’lon qilinishi shart emas, degan qarorga keldi.
Izoh (0)