OAV: Ukraina g‘alla eksporti uchun yangi yo‘lni taklif qildi

Ukraina hukumati o‘z hududidan g‘alla eksporti uchun “yangi xavfsiz yo‘lak”ni taklif qildi, deb xabar bermoqda Turkiyaning Yeni Safak gazetasi. 

Ushbu koridorning yo‘nalishi qanday bo‘lishi aniqlanmagan. Agar Rossiya va Ukraina kelisha olsa, ularning vakillari Istanbulda Turkiya va BMT ishtirokida yig‘ilish o‘tkazadi.

Gazetaning yozishicha, donni eksport qilish rejasi ustida ish olib borilmoqda. Ukraina o‘z portlari minalardan tozalangandan so‘ng xavfsizlik kafolatlarini talab qilmoqda.

Ukraina va Rossiya jahon bozoriga yetkazib bera olmagan g‘allaning umumiy hajmi 40 million tonnaga baholanmoqda. Shu sababdan ikki davlat o‘zaro murosaga kelishi juda ham muhim. 

“Milliyet” gazetasining yozishicha, 27-iyundan 3-iyulgacha Rossiya, Ukraina, Turkiya va BMT o‘rtasida Istanbulda muzokaralar bo‘lib, unda g‘alla masalasi muhokama qilinadi.

Rossiya prezidenti Vladimir Putin portlar minalardan tozalangan taqdirda Ukraina donini eksport qilishga yordam berishga tayyorligini aytdi. Ukraina birinchi navbatda xavfsizlik kafolatlarini olmoqchi.

Avvalroq BMT Ukraina g‘allasi bo‘yicha muzokaralar to‘xtagani sababli ochlik xavfidan ogohlantirgan edi.