Hindistonda 12 yil avval ishlangan filmning finali sun’iy intellekt orqali yaratiladi va qayta namoyish etiladi

Hindistonda 2013-yilda suratga olingan “Telba oshiqlar” melodramasi qayta prokatga chiqariladi. Filmning final qismi sun’iy intellekt yordamida baxtli yakun bilan almashtiriladi, deb xabar berdi “Pravila jizni”. Ammo rejissyor Anand Ray bu qarorga salbiy munosabat bildirdi.

The Guardian nashrining yozishicha, bu jahon kino sanoatida sun’iy intellekt orqali film finalini o‘zgartirish bo‘yicha ilk tajriba bo‘lishi mumkin. Ximanshu Sharmaning ssenariysi asosida suratga olingan “Telba oshiqlar” (“Raanjhanaa”) romantik dramasi Varanasida yashovchi ruhoniyining o‘g‘li va musulmonning qizi o‘rtasidagi fojiali muhabbat haqida hikoya qiladi. Yangilangan syujetga ega film joriy yil 1-avgust kuni tamil tilida “Ambikapathy” nomi bilan qayta prokatga chiqadi.

Fojiali yakun o‘rniga sun’iy intellekt tomonidan yaratilgan “baxtli yakun” taqdim etilishiga rejissyor Anand Ray qattiq norozilik bildirdi va bu haqda matbuot orqali bilganini aytdi. Rejissyor va uning jamoasi Hindiston kino va televideniye rejissyorlari assotsiatsiyasiga murojaat qilib, masalaning huquqiy jihatlarni o‘rganishni boshladi.

“Men ijodiy g‘oya va mualliflik huquqi kabi tushunchalarning ahamiyati yo‘qolib borayotgan kelajak sari ketayotganimizdan chuqur iztirobdaman. Men bu qadar bema’ni va mantiqsiz tajribadan o‘zimni chetda tutaman. Horicha qo‘limdan keladigan yagona narsa shu”, dedi u Press Trust of India nashriga.

Filmni qayta prokatga chiqarishni Eros Media Group kinokompaniyasi amalga oshirmoqda. Kompaniya bosh direktori Pradrip Dviveydi bu qarorni uzoq muddatli strategiya doirasida “birinchi tajriba” deb atadi. Bundan tashqari, Dviveydi 3000 dan ortiq boshqa filmlarni sun’iy intellekt yordamida qayta ko‘rib chiqish ustida jiddiy o‘ylayotganini ham ta’kidladi.

“Agar texnologiya bizga yangilik qilish imkonini bersa va biz uning yordamida foydali ish bajara olsak, buning nimasi yomon? Zamonaviy texnologiya imkoniyatlari, ijodiy jarayon va tomoshabin istaklari o‘rtasida o‘zaro muvozanat bo‘lishi kerak”, dedi Dviveydi.

“Telba oshiqlar” filmi Anand Ray asos solgan Colour Yellow Productions kompaniyasi tomonidan ishlab chiqarilgan. Prokat va tarqatish huquqi Eros Media Group’ga tegishli bo‘lgan.

Biroq Colour Yellow Productions’ning operatsion direktori Xarini Lakshminariyan aytishicha, Eros bilan hamkorlik “bir muddat avval tugagan”.

“Agar tayyor film rejissyorning xabarisiz o‘zgartirilishi va qayta chiqarilishi mumkin bo‘lsa, bu rejissyor ovozi ahamiyatga ega emasligi bildiradi”, dedi u.

Kinotanqidchilarning fikricha, film syujetini o‘zgartirish va baxtli yakun yasash diniy guruhlararo munosabatlarga qanday ta’sir qilishi avvaldan noma’lum. Chunki mazkur film bir vaqtlar odamlarni hayajonga solgan, unda qahramonlar jamiyat qoidalariga qarshi chiqqan.