Украина ҳукумати ўз ҳудудидан ғалла экспорти учун «янги хавфсиз йўлак»ни таклиф қилди, деб хабар бермоқда Туркиянинг Yeni Safak газетаси.
Ушбу коридорнинг йўналиши қандай бўлиши аниқланмаган. Агар Россия ва Украина келиша олса, уларнинг вакиллари Истанбулда Туркия ва БМТ иштирокида йиғилиш ўтказади.
Газетанинг ёзишича, донни экспорт қилиш режаси устида иш олиб борилмоқда. Украина ўз портлари миналардан тозалангандан сўнг хавфсизлик кафолатларини талаб қилмоқда.
Украина ва Россия жаҳон бозорига етказиб бера олмаган ғалланинг умумий ҳажми 40 миллион тоннага баҳоланмоқда. Шу сабабдан икки давлат ўзаро муросага келиши жуда ҳам муҳим.
«Milliyet» газетасининг ёзишича, 27 июндан 3 июлгача Россия, Украина, Туркия ва БМТ ўртасида Истанбулда музокаралар бўлиб, унда ғалла масаласи муҳокама қилинади.
Россия президенти Владимир Путин портлар миналардан тозаланган тақдирда Украина донини экспорт қилишга ёрдам беришга тайёрлигини айтди. Украина биринчи навбатда хавфсизлик кафолатларини олмоқчи.
Аввалроқ БМТ Украина ғалласи бўйича музокаралар тўхтагани сабабли очлик хавфидан огоҳлантирган эди.
Изоҳ (0)