O‘zbekistonda eng ko‘p ulgurji savdo amalga oshirilgan hududlar ma’lum qilindi

Davlat statistika qo‘mitasi 2022-yil yanvar—may oylari bo‘yicha ulgurji savdo aylanmasini e’lon qildi.

Respublika bo‘yicha ulgurji savdo aylanmasi 73,1 mlrd so‘m, ya’ni 2021-yilning yanvar—aprel oylariga nisbatan 18,6 foizga o‘sgan.

Tarkibiy qismlari 71,1 foiz mikrofirma va kichik korxonalari va 28,9 foiz yirik korxonalar hissasiga to‘g‘ri keldi.

Kichik biznes subyektlarining ulgurji savdo aylanmasidagi ulushi 52 mlrd so‘mni tashkil qilgan.

Bu esa 2021-yilning mos davriga nisbatan 19 foizga o‘sishni anglatadi.

Tovar aylanmasida eng yuqori ulush Toshkent shahrida — 58,4 foiz. Keyingi o‘rinlarda Toshkent (7,3 foiz) va Buxoro (6,2 foiz) viloyatlariga to‘g‘ri keladi.

Yuqori o‘sish sur’atlariga ega yirik korxonalar Buxoro (158,9 foiz), Andijon (122,7 foiz) viloyatlari va Toshkent shahrida (118,9 foiz) kuzatildi.

So‘nggi yillarda ulgurji savdoda davlat sektorining o‘rni pasayib bormoqda. Ushbu sektorning jami ulgurji tovar aylanmasidagi ulushi 0,1 foizni tashkil qildi.

Nodavlat tasarrufga ega subyektlar tomonidan ulgurji savdo aylanmasi 73,1 mlrd so‘mni va davlat tasarrufiga ega korxonalar tomonidan 27,8 mlrd so‘mni tashkil etdi.

Hududlar kesimida davlat mulkini hali ham Toshkent shahrida (0,11 foiz), Navoiy (0,17 foiz) va Andijon (0,04 foiz) viloyatlarida saqlanib qolinganligini ko‘rish mumkin.

Boshqa barcha hududlarda ulgurji savdo to‘liq nodavlat mulkka tegishli.