AQSHning Missuri shtati Mendon shahri yaqinida yuk mashinasi bilan to‘qnashgan yo‘lovchi poyezdi relsdan chiqib ketdi. Bu haqda Amtrak transport kompaniyasi bayonotida aytiladi.
Hodisa tartibga solinmagan chorrahada sodir bo‘lgan. Sakkiz vagon va ikkita lokomotivdan iborat poyezd Los-Anjelesdan Chikagoga ketayotgan edi. Poyezd ichida 243 nafar yo‘lovchi va 12 ekipaj a’zosi bo‘lgan.
“Uch kishi halok bo‘ldi — ulardan ikki nafari poyezdda, bir nafari yuk mashinasida”, — dedi shtat yo‘l patrul xizmati vakili Jastin Dann matbuot anjumanida.
Rasmiylar hozircha yaradorlarning aniq sonini aytmagan. CNN ma’lumotlariga ko‘ra, kamida 50 kishi jarohatlangan. Jabrlanganlardan biri vertolyotda Kanzas-Sitidagi tibbiyot markaziga yetkazilgan, deya tasdiqladi KSHB muassasa vakili. Kamida to‘qqiz nafar yo‘lovchi Missuri sog‘liqni saqlash universiteti kasalxonasiga yetkazilgan.
8-iyun kuni Eronning Mashhad shahridan Yazdga ketayotgan poyezd Janubiy Xuroson viloyatining Tebes shahrida relsdan chiqib ketgan edi. Hodisa oqibatida kamida 13 kishi halok bo‘lgan, yana 50 kishi jarohat olgan. Poyezd temiryo‘lda ekskavator bilan to‘qnashib ketgan, shundan so‘ng to‘rtta vagon relsdan chiqib ketgan.
Izoh (0)