28-iyun kuni BMT Xavfsizlik kengashi Ukrainadagi vaziyat bo‘yicha favqulodda yig‘ilish o‘tkazadi, deb yozadi “RBK” raislik qiluvchi Albaniya missiyasiga tayanib.
“Ukraina so‘nggi kunlarda butun mamlakat bo‘ylab shaharlar shiddatli tarzda o‘qqa tutila boshlagach, Xavfsizlik kengashi raisidan yig‘ilish chaqirishni so‘radi”, — deyiladi kengash xabarida. Ukrainaning BMTdagi doimiy vakili Sergey Kislitsa uchrashuv haqida so‘rov kiritilganini tasdiqladi.
Ukrainada xavfsizlikni ta’minlash va tinchlikni qo‘llab-quvvatlash masalasi bo‘yicha majlis 28-iyun kuni 15:00 (Toshkent vaqti bilan 29-iyun 00:00)da boshlanadi.
Majlisda Xavfsizlik kengashi a’zolari Ukrainaning Poltava viloyati Kremenchug shahridagi vaziyatni muhokama qiladi, deb yozdi AQSHning BMTdagi doimiy vakili Linda Tomas-Grinfild Twitter’da.
27-iyun kuni Kremenchugdagi “Amstor” savdo markaziga raketa kelib tushdi va 10 ming metr kvadrat maydonda yong‘in boshlandi.
Ukraina prezidenti Vladimir Zelenskiyning so‘zlariga ko‘ra, sirenalar yoqilishi arafasida binoda mingdan ortiq odam bo‘lgan, ularning ko‘pchiligi evakuatsiya qilingan. 28-iyunga o‘tar kechasi olingan ma’lumotlarga ko‘ra, 16 kishi halok bo‘lgan. Yana 59 kishi jabrlangan, ularning 25 nafari kasalxonaga joylashtirilgan.
BMT matbuot kotibi Stefan Dyujarrik savdo markaziga qilingan hujumni o‘ta qayg‘uli deb atadi. “Har qanday fuqarolik infratuzilmasi hech qachon hujumlarga uchramasligi kerak, bu infratuzilma, albatta, savdo markazlari va oddiy fuqarolarni o‘z ichiga oladi”, — dedi u.
Rossiya Ukrainadagi harbiy operatsiyani 24-fevral kuni boshladi. Mudofaa vazirligi rossiyalik harbiylar faqat harbiy infratuzilmaga zarbalar berayotganini ma’lum qilgandi.
Izoh (0)