Moskvada politsiya muxolifatchi siyosatchi, Moskvaning Krasnoselskiy tumani munitsipal deputati Ilya Yashinni qo‘lga oldi, deb xabar bermoqda Meduza jurnalist Irina Babloyanga tayanib.
“Do‘stim Ilya Yashin bilan Xamovnikidagi bog‘da sayr qilib yurgandik. Politsiyachilar kelib, Ilyani noma’lum tomonga olib ketdi”, — deb yozdi Babloyan o‘z Telegram-kanalida.
“OVD-Info” siyosatchining ismi oshkor etilmagan do‘stiga tayanib xabar berishicha, Yashin “Lujniki” ichki ishlar bo‘limiga keltirilgan.
Advokat Vadim Proxorov ma’lum qilishicha, muxolifatchiga nisbatan “politsiya xodimining qonuniy buyrug‘iga itoat qilmaslik” ma’muriy moddasi ilgari surilmoqda, u 15 sutkagacha muddatga qamalishi mumkin.
Ilya Yashin — Rossiyada qolgan va Ukraina bilan urushga ochiqdan-ochiq qarshi chiqayotgan kamdan-kam muxolifatchi siyosatchilardan biri.
May oyida Ilya Yashinga nisbatan Rossiya armiyasini “obro‘sizlantirganlik” haqidagi ma’muriy modda bo‘yicha to‘rtta protokol tuzilgan edi. “Tushunishimcha, menga yirik jarima va istiqbolda — jinoiy ta’qib xavf solmoqda. Nima ham derdim, mening pozitsiyam oddiy. Hech kimdan qochib, bekinmoqchi emasman, o‘z gaplarimdan ham tonmayman”, — degan edi o‘shanda siyosatchi. Keyinroq u to‘rtta protokoldan uchtasi bo‘yicha 90 ming rubl jarimaga tortilgan edi.
Aprel oxirida Yashin armiya haqidagi “feyklar” ishi bo‘yicha guvoh sifatida so‘roq qilingan. Ushbu ish bo‘yicha Moskvaning avval Yashin rahbarlik qilgan Krasnoselskiy munitsipal okrugi rahbari Yelena Kotyonochkina va okrug deputati Aleksey Gorinov ayblanmoqda. Deputatlar kengashi majlislaridan birida ular Ukrainadagi urushni urush deb, Rossiya armiyasi ishini esa “fashist davlatining xatti-harakatlari” deb atagan. Kotyonochkina hozir chet elda, Gorinov esa tergov izolyatorida.
Izoh (0)