Leonid Fedun nafaqa yoshiga yetgani va oilaviy sharoiti tufayli “Lukoyl” vitse-prezidentligini tark etdi. Bu haqda kompaniya matbuot xizmati xabar bergan.
“Lukoyl” prezidenti Vadim Vorobyov Fedunni kompaniya tarixidagi eng asosiy insonlardan biri deb e’tirof qildi.
“U sohadagi bir qator muhim voqea-hodisalarni oldindan ko‘ra olgan va bu strategik hujjatlarda o‘z aksini topgan”, — deya Vorobyov so‘zlaridan iqtibos keltirgan matbuot xizmati.
Fedun 1996-yildan beri “Lukoyl” vitse-prezidenti lavozimida ishlab kelayotgandi. Uning o‘zi “RBK” nashriga lavozimdan ketgach kompaniya aksiyadori bo‘lib qolishini aytgan. Fedun va uning oilasi “Lukoyl”ning 9,3 foizlik aksiya ulushiga egalik qiladi.
Shuningdek, Leonid Fedun “Spartak” futbol klubi egalaridan biri hisoblanadi. Tadbirkor “Lukoyl”dan ketishi klub ishlariga ta’sir ko‘rsatmasligini ta’kidlagan.
Fedun va uning oila a’zolari Forbes talqiniga ko‘ra Rossiyaning eng boy insonlari o‘ttizlik ro‘yxatiga kirgan. 2021-yil yakunlari bo‘yicha jurnal oilaning boyligini 5 milliard dollarga baholagan (Ukrainada urush boshlanganidan keyin OAVda “Lukoyl” aksiyalari narxi tushgani haqida xabarlar tarqalgan va bu Fedunlar oilasi kapitaliga ta’sir ko‘rsatgan).
Aprel oxirida “Lukoyl” asoschisi va 1993-yildan buyon unga rahbarlik qilib kelgan Vagit Alekperov kompaniyadan ketganini e’lon qilgan. U o‘ziga qarshi e’lon qilingan sanksiyalar “Lukoyl”ning taraqqiyotiga salbiy ta’sir ko‘rsatishini istamasligini bayon etgan.
May oxirida Vadim Vorobyov “Lukoyl”ning yangi prezidentligiga tayinlandi, u asosiy rahbar kursisini egallaguniga qadar 4 yil davomida kompaniyaning birinchi vitse-prezidenti sifatida ishlagan.
Izoh (0)