AQSH shu haftadayoq Kiyevga o‘rta va katta masofali raketa hujumiga qarshi ilg‘or mudofaa tizimlari berilishini e’lon qilishni rejalashtirmoqda, deb yozadi “RBK”.
CNN telekanali manbalariga ko‘ra, ko‘mak Ukraina tomonidan bo‘lgan tegishli so‘rovlarga javoban taqdim etiladi. Bundan tashqari, qo‘shimcha artilleriya o‘q-dorilari va kontrbatareya radarlarini o‘z ichiga oluvchi yana boshqa harbiy yordam haqida ham e’lon qilinishi mumkin.
CNN aniqlik kiritishicha, Kiyev avvalroq Norvegiyada ishlab chiqarilgan, 160 km masofadagi nishonlarni urishga qodir NASAMS raketa hujumiga qarshi mudofaa tizimlarini so‘ragan edi. Shu bilan birga, telekanal qayd etishicha, bu juda murakkab texnika bo‘lib, Ukraina harbiylariga uni boshqarish uchun bilim berilishi kerak.
G‘arb mamlakatlari 24-fevral kuni boshlangan Rossiya harbiy operatsiyasi fonida Ukrainaga qurol yetkazib berishni kuchaytirdi. O‘shandan buyon ular Kiyevga umumiy qiymati qariyb 38,5 milliard dollarga teng qurol-yarog‘, harbiy texnika va harbiy maqsadlarga qaratilgan mablag‘larni yetkazib bergan yoki yetkazish majburiyatini olgan.
Vashington, xususan, fevral oxiridan buyon Kiyevga 6,1 milliard dollarlik harbiy yordam yuborgan. 23-iyun kuni Oq uy Milliy xavfsizlik kengashining strategik kommunikatsiyalar bo‘yicha koordinatori Jon Kirbi HIMARS baravar o‘t ochish reaktiv tizimi, shuningdek, boshqa harbiy texnika va o‘q-dorilardan iborat 450 million dollarlik qo‘shimcha paket haqida e’lon qildi. 25-iyun kuni Ukraina qurolli kuchlari bosh qo‘mondoni Valeriy Zalujniy yetkazib berilgan HIMARS baravar o‘t ochish reaktiv tizimlari Ukraina nazorati ostida bo‘lmagan hududlarda allaqachon jangovar harakatlarni olib borayotganini ma’lum qildi.
Rossiya bir necha marta G‘arb mamlakatlarini Ukrainani qurol bilan to‘ldirib tashlayotganlikda ayblab, xorijiy qurol-yarog‘ konvoylari Rossiya armiyasining “qonuniy nishonlari”ga aylanishi haqida ogohlantirgandi. Rossiyaning AQSHdagi elchisi Anatoliy Antonov Ukrainaga uzoq masofali snaryadlar yetkazib berilgan taqdirda Rossiya shaharlariga zarbalar berish xavfi yuzaga kelishi mumkinligini aytgandi. Vashington ham, Kiyev ham voqealar rivojining bunday talqinini istisno qilgandi.
Izoh (0)