Turkiya Rossiyaning Ukrainadagi harbiy operatsiyasini qoralaydi, biroq Moskvaning qarori G‘arbning 30 yil mobaynidagi xatti-harakatlari, shu jumladan, NATOning kengayishi bilan bog‘liq bo‘lishi mumkin, deb hisoblaydi. Bu haqda Turkiya prezidentining vakili Ibrohim Kalin Haberturk telekanali efirida ma’lum qildi, deb yozadi “RBK”.
“Bu Rossiyaning Ukrainaga bostirib kirishini oqlamaydi. Ammo so‘nggi 30 yil ichida nimalar sodir bo‘lganiga qarasangiz, sabab-oqibat bog‘liqligini ko‘rib chiqish kerak, bu — ham G‘arbning xatti-harakatlari, ham NATOning kangaytirilishi. Biz bu noto‘g‘ri xalqaro tartibga qarshi norozilik bildiramiz”, — dedi u.
Turkiya prezidenti vakili fikricha, “yangi tartibda piramidaning eng tepasida o‘ta kuchli mamlakat turadi”, undan keyinda besh-oltida “buyuk kuchlar”: Rossiya, Xitoy, Buyuk Britaniya, Fransiya va Germaniya joylashadi. “Rossiya geostrategik va harbiy jihatdan bu piramidaga shubha bildira boshladi va 30 yildan keyin shartlarni qayta ko‘rib chiqib, muvozanat haqida yangi bitim imzolashni taklif qildi. Pastda tepaga chiqishga urinayotganlarni bostirmoqchi bo‘lganlar ‘keling, nizo yo‘lidan boramiz’ dedi”, — deya qo‘shimcha qildi Kalin.
Bundan tashqari, Ibrohim Kalin Turkiya G‘arb Rossiyaga nisbatan kiritgan sanksiyalarga qo‘shilmoqchi emasligini ma’lum qildi.
Uning so‘zlariga ko‘ra, Turkiya vaqti-vaqti bilan G‘arbdan Rossiyaga qarshi sanksiyalar zarurligi borasida so‘rovlar olib turadi, biroq Anqara “muvozanat siyosatiga amal qilmoqda”.
“Biz sanksiyalar kiritmaymiz va ularga qo‘shilmaymiz. Biz o‘z manfaatlarimizni himoya qilishimiz kerak. Agar hamma aloqalarni uzib ketaversa, oxirida Rossiya bilan kim gaplashadi? Rossiya bilan iqtisodiy aloqalarimiz shunday xususiyatga egaki, sanksiyalar joriy qilish Rossiyadan ko‘ra Turkiya iqtisodiyotiga ko‘proq zarar keltiradi. Biz sanksiyalar masalasida aniq pozitsiyani egalladik. G‘arbda uni qabul qilishdi”, — dedi Erdo‘g‘onning vakili.
Rossiya 24-fevraldan buyon Ukrainada harbiy operatsiya o‘tkazmoqda. Prezident Vladimir Putin uning asosiy maqsadlari Donbass aholisini “genotsid”dan himoya qilish hamda qo‘shni mamlakatni “demilitarizatsiya va denatsifikatsiya qilish” (qurolsizlantirish va natsizmni yo‘qotish) deb atagandi.
Oxir-oqibat u Ukrainadagi maxsus operatsiya Rossiya uchun o‘z hududiga qarshi tajovuz oldini olishning yagona imkoniyati bo‘lganini ma’lum qildi. “Hamma narsa AQSH va uning kichik sheriklari pul tikkan neonatsistlar, banderachilar bilan to‘qnashuv muqarrarligidan darak berardi. Harbiy infratuzilma joylashtirilayotganini, yuzlab chet ellik maslahatchilar ishlay boshlaganini, NATO mamlakatlaridan eng zamonaviy qurollar muntazam yetkazib berilayotganini ko‘rdik”, — degan edi Putin.
O‘tgan yil oxirida Putin NATOning sharqqa qarab kengaymasligi bo‘yicha yuridik kafolatlarga erishish haqida mavzuli muzokaralar boshlashni taklif qilgandi. Prezident Rossiyaga aynan yuridik kafolatlar kerakligini, chunki G‘arb mamlakatlari o‘z zimmasiga olgan og‘zaki majburiyatlarni bajarmaganini aytdi. Prezident “Rossiyaning xavfsizlik sohasidagi asosli xavotirlari” e’tiborsiz qoldirilib kelgani va haligacha shunday bo‘layotganini ta’kidladi.
Bunga javoban NATO bosh kotibi Yens Stoltenberg Ukraina va boshqa mamlakatlarning NATOga qo‘shilishga tayyorlik darajasi haqidagi qarorni alyans a’zolari qabul qilishini, Rossiya esa bu masalada veto huquqiga ega emasligini ma’lum qildi. Rossiya, AQSH va NATOning xavfsizlik kafolatlari masalasi bo‘yicha muzokaralari ham natija keltirmadi.
Izoh (0)