Беларусда олти йиллик колонияга ҳукм қилинган россиялик Софья Сапега президент Александр Лукашенко номига афв этиш тўғрисида ариза ёзди. Бу ҳақда адвокатга таяниб, BBC Russia хабар берган.
Нашр маълумотларига кўра, аризада Сапега жиноятни «қўпорувчилик кайфиятидаги одамлар гуруҳи» таъсири остига тушган ҳолда, «ёшлик ва аҳмоқлик қилиб» амалга оширганини ёзган.
BBC қайд этишича, қиз жабрланувчиларга товон пулини тўлиқ тўламагани афв этилиш учун тўсиқ бўлиши мумкин.
Софья Сапега 2021 йил майида ўзининг ўша пайтдаги йигити, Nexta Telegram-канали собиқ бош муҳаррири Роман Протасевич билан бирга қўлга олинган эди. Уларнинг Афинадан Вильнюсга учаётган Ryanair рейси шошилинч тарзда Минскка қўндирилганди.
Сапега Беларусь хавфсизлик кучларининг шахсий маълумотлари эълон қилиниб борувчи «Беларусь қора китоби» Telegram-каналига администраторлик қилишда айланди. 2022 йил майида у ижтимоий душманликни қўзғатиш ва шахсий маълумотларни ноқонуний тўплаш ҳақидаги моддалар бўйича олти йиллик колонияга ҳукм қилинди.
Ҳукм эълон қилинганидан кейин Беларусь президенти Александр Лукашенко Сапегани «бечора қизча» деб атаб, уни Россияга топшириш мумкинлигини айтганди. «Жазо муддатини ўша ерда ўтасин. Ёки истаганларини қилишсин», — деганди у.
Сапега 2021 йилнинг декабрь ойида ҳам Александр Лукашенкодан афв сўраган эди. Қизнинг ўгай отаси у «тергов билан келишувга, Россиянинг ёрдамига, экстрадицияга ва иш умуман судгача бормаслигига умид қилаётганини» айтганди.
Роман Протасевич ҳибсга олинганидан сўнг жиноий иши бўйича тергов билан ҳамкорлик қила бошлади, шунингдек, у Беларусь ва Россиядаги ҳукуматпараст оммавий ахборот воситаларига бир нечта интервьюлар берди. Ҳозир у уй қамоғида, интернетдан фойдаланишга рухсат берилган. Протасевичга қарши суд ҳали бошланмаган.
Изоҳ (0)