Qurollar ro‘yxati iyun oyi oxirida bo‘lib o‘tadigan NATO sammitidan so‘ng to‘liq shakllantiriladi. Paket asosan zirhli texnika va artilleriyani o‘z ichiga oladi, Rim Kiyevga uzoq masofaga o‘t ochuvchi qurollarni yubormaydi.
Italiya hukumati Ukrainaga harbiy yordamning yangi paketi ustida ishlamoqda va Rossiya harbiy operatsiyasi boshlanganidan buyon mamlakatga to‘rtinchi qurol-yarog‘ partiyasini jo‘natishga tayyorlanmoqda, deya xabar beradi Il Messagero gazetasi.
Qurollar ro‘yxati maxfiy bo‘ladi. Hukumatdagi manbaga ko‘ra, yordam partiyasi asosan zirhli transport vositalari, artilleriya, jumladan, 25-30 kilometr masofagacha nishonga oluvchi FH-70 gaubitsalari, o‘q-dorilar, pulemyotlar, xususan, Beretta MG42/59 pulemyoti hamda lager chodirlari, tibbiy asbob-uskunalar kabi anjomlarni o‘z ichiga oladi.
Rasmiylar, shuningdek, Italiyaning Ukraina harbiylarini G‘arb qurollari bilan ishlashga o‘rgatishdagi hissasini oshirish imkoniyatini muhokama qilmoqda.
Yakuniy qurollar ro‘yxati 28-30-iyun kunlari Madridda bo‘lib o‘tadigan NATO sammitidan so‘ng shakllantiriladi. Bosh kotib Yens Stoltenberg avvalroq ittifoqchilar Ukrainaga harbiy yordam paketi bo‘yicha kelishib olishiga va’da bergan edi.
Izoh (0)