Япония Россияга қарши санкцияларни 70 нафар жисмоний ва 90 та юридик шахсга кенгайтиради, шунингдек, Россиядан олтин импорт қилиш ва бир қатор хизматлар кўрсатишни тақиқлайди. Бу ҳақда Япония бош вазири Фумио Кисиданинг G7 саммитидаги баёнотига таяниб NHK телеканали хабар берди.
Бош вазирнинг сўзларига кўра, санкциялар биринчи навбатда Россия мудофаа саноати билан боғлиқ шахслар ва ташкилотларга таъсир қилади. Уларнинг Япониядаги ҳисоблари музлатилади.
«Биз Россиянинг Украинага босқини сингари статус-квонинг бир томонлама ўзгариши содир бўладиган дунёни қабул қилмаймиз, биз қонун устуворлигига асосланган халқаро тартибни мустаҳкамлаймиз», — деди Кисида.
Февраль ойи охиридан бошлаб Япония ҳукумати Россияга қарши бир нечта чекловчи чоралар пакетини маъқуллади, компаниялар ва жисмоний шахсларга нисбатан санкциялар жорий қилди, мамлакатга сармоя киритишни тақиқлади, экспортни чеклади ва савдода имтиёзли режимни бекор қилди. Хусусан, июнь ойи бошида Токио Россияга «саноат инфратузилмасини мустаҳкамлашга ёрдам берадиган» маҳсулотлар: пўлат баклар, конвеерлар, самосваллар, бульдозерлар, тўқув дастгоҳлари ва бошқаларни экспорт қилишни тақиқлади.
NHK аввалроқ Россияга қарши санкциялар Япониянинг энг йирик банклари Mitsubishi UFJ, Sumitomo Mitsui ва Mizuho 2,7 миллиард доллардан кўпроқ зарар кўргани ҳақида хабар берган эди. Йўқотишларнинг аксарияти банк мижозлари санкциялар таъсирида уларга берилган кредитларни тўлай олмаётгани билан боғлиқ.
Россия санкцияларга жавобан чоралар кўрди: 63 нафар Япония фуқаросининг мамлакатга киришини тақиқлади. Чекловларга бош вазир Фумио Кисида, Вазирлар Маҳкамаси бош котиби Хирокадзу Мацуно, ташқи ишлар вазири Ёсимаса Хаяси, молия вазири Сюнити Судзуки, мудофаа вазири Нобуо Киси ва адлия вазири Ёсихиса Фурукава, шунингдек, Япония парламентининг икки палатаси аъзолари киритилган. Бундан олдин, март ойида Москва Токио билан тинчлик келишуви бўйича музокара қилишдан бош тортган эди.
Изоҳ (0)