Kolumbiyaning Espinal shahrida tomoshabinlar o‘tirgan tribuna qulab tushishi oqibatida besh kishi halok bo‘ldi, 200 dan ortiq odam jabrlandi, deb yozadi “RBK”.
Hodisa avliyo Pyotr bayrami munosabati bilan o‘tkazilgan ensyerro (buqalardan qochish o‘yini) chog‘ida yuz bergan. Oqibatda buqa arenadan qochib chiqib ketgan, shaharda sariq darajali trevoga e’lon qilingan.
Jabrlanganlar haqida rasmiy ma’lumotlar hozircha yo‘q, tez yordam 200 dan ziyod kishi shikastlangani haqida xabar bermoqda.
Voqea joyiga qutqaruvchilar kelib, jabrlanganlarga tribuna vayronalari ostidan chiqishga yordamlashmoqda.
Hukumat to‘rt kishining o‘limini tasdiqladi, ular orasida uch yoshli bola ham bor. Qurbonlarning shaxslari oshkor etilganicha yo‘q. Kamida sakkizta tribuna qulab tushgan.
Provinsiya fuqarolar mudofaasi direktori mayor Luis Fernando Veles besh kishi halok bo‘lgani haqidagi ma’lumotni tasdiqladi va 70 ga yaqin odam jabrlanganini aytdi. Uning so‘zlariga ko‘ra, vayronalar ostida hech kim qolmagan, bedarak yo‘qolgan deb hisoblangan bir necha kishi topilgan. U favqulodda vaziyat bartaraf etilganini ma’lum qildi.
Kolumbiyaning saylangan prezidenti Gustavo Petro fojiadan keyin buqalar jangini taqiqlashni taklif qildi.
“Biz shunga o‘xshash holatga Sinselexoda ham guvoh bo‘lgan edik. Shaharlar rahbariyatlaridan odamlar va hayvonlar o‘limini keltirib chiqarayotgan tadbirlarni o‘tkazishga ruxsat bermaslikni so‘rayman”, — deb yozdi u Twitter’da.
Eslatib o‘tamiz, mart oyida Hindistondagi futbol o‘yinida muxlislar o‘tirgan stadion tribunasi qulab tushib, hodisa oqibatida 200 dan ortiq kishi jabrlangan edi.
2021-yilda esa Isroildagi sinagogada tribuna qulashi oqibatida 2 kishi halok bo‘lib, 200 dan ortiq odam jabrlangan edi.
Izoh (0)