Janubiy Afrika Respublikasining Ist-London shahrida kamida 21 kishi tungi klubdagi o‘tirishdan keyin vafot etdi, deb yozadi Meduza mahalliy politsiyaga tayanib. Marhumlarning ko‘pchiligi klubda jonsiz holatda topilgan, yana bir necha kishi kasalxonada vafot etgan.
Dastlabki ma’lumotlarga ko‘ra, vafot etganlar 13 dan 20 yoshgacha bo‘lgan yosh yigit-qizlar.
Hodisa sababi noma’lum. Dastlabki ma’lumotlarga qaraganda, marhumlarning badanlarida zo‘ravonlik belgilari yo‘q. Ommaviy zaharlanish versiyasi hozircha tasdiqlanmadi.
Mahalliy fuqarolar aytishicha, bar voyaga yetmaganlarga spirtli ichimliklar sotgan.
Mamlakat prezidenti Siril Ramaposa barda kamida 22 nafar o‘smir vafot etganini ma’lum qildi.
“Erta tongda Ist-Londondagi Sineri-parkda joylashgan barda vafot etgan 22 nafar o‘smirning oilalariga chuqur hamdardlik bildiraman”, — deb yozdi Ramapos Twitter’da.
Davlat rahbari tungi klubda voyaga yetmagan tashrifchilar bo‘lgani yuzasidan xavotir bildirdi.
SABC telekanali xabar qilishicha, 20 kishi kuchli tiqilinch oqibatida halok bo‘lgan, ularning aksariyati — voyaga yetmaganlar.
Jasadlar yorib ko‘rish va shaxsini aniqlash uchun morglarga yetkazila boshladi. “O‘limning ehtimoliy sababini aniqlash uchun zudlik bilan murdalarni yorib ko‘rishga kirishmoqchimiz”, — dedi Sharqiy Kap provinsiyasi sog‘liqni saqlash departamenti vakili Siyanda Manana. Uning tasdiqlashicha, gap 22 nafar qurbon haqida bormoqda. Xususan, toksikologik testlar o‘tkaziladi.
Bar yaqinida yashovchi 17 yoshli qiz Reuters’ga ma’lum qilishicha, bu joy yoshlar orasida mashhur bo‘lgan, chunki u yerda voyaga yetmaganlarga spirtli ichimliklar sotilgan.
Izoh (0)