Туркия Россиянинг Украинадаги ҳарбий операциясини қоралайди, бироқ Москванинг қарори Ғарбнинг 30 йил мобайнидаги хатти-ҳаракатлари, шу жумладан, НАТОнинг кенгайиши билан боғлиқ бўлиши мумкин, деб ҳисоблайди. Бу ҳақда Туркия президентининг вакили Иброҳим Калин Haberturk телеканали эфирида маълум қилди, деб ёзади «РБК».
«Бу Россиянинг Украинага бостириб киришини оқламайди. Аммо сўнгги 30 йил ичида нималар содир бўлганига қарасангиз, сабаб-оқибат боғлиқлигини кўриб чиқиш керак, бу — ҳам Ғарбнинг хатти-ҳаракатлари, ҳам НАТОнинг кангайтирилиши. Биз бу нотўғри халқаро тартибга қарши норозилик билдирамиз», — деди у.
Туркия президенти вакили фикрича, «янги тартибда пирамиданинг энг тепасида ўта кучли мамлакат туради», ундан кейинда беш-олтида «буюк кучлар»: Россия, Хитой, Буюк Британия, Франция ва Германия жойлашади. «Россия геостратегик ва ҳарбий жиҳатдан бу пирамидага шубҳа билдира бошлади ва 30 йилдан кейин шартларни қайта кўриб чиқиб, мувозанат ҳақида янги битим имзолашни таклиф қилди. Пастда тепага чиқишга уринаётганларни бостирмоқчи бўлганлар ‘келинг, низо йўлидан борамиз’ деди», — дея қўшимча қилди Калин.
Бундан ташқари, Иброҳим Калин Туркия Ғарб Россияга нисбатан киритган санкцияларга қўшилмоқчи эмаслигини маълум қилди.
Унинг сўзларига кўра, Туркия вақти-вақти билан Ғарбдан Россияга қарши санкциялар зарурлиги борасида сўровлар олиб туради, бироқ Анқара «мувозанат сиёсатига амал қилмоқда».
«Биз санкциялар киритмаймиз ва уларга қўшилмаймиз. Биз ўз манфаатларимизни ҳимоя қилишимиз керак. Агар ҳамма алоқаларни узиб кетаверса, охирида Россия билан ким гаплашади? Россия билан иқтисодий алоқаларимиз шундай хусусиятга эгаки, санкциялар жорий қилиш Россиядан кўра Туркия иқтисодиётига кўпроқ зарар келтиради. Биз санкциялар масаласида аниқ позицияни эгалладик. Ғарбда уни қабул қилишди», — деди Эрдўғоннинг вакили.
Россия 24 февралдан буён Украинада ҳарбий операция ўтказмоқда. Президент Владимир Путин унинг асосий мақсадлари Донбасс аҳолисини «геноцид»дан ҳимоя қилиш ҳамда қўшни мамлакатни «демилитаризация ва денацификация қилиш» (қуролсизлантириш ва нацизмни йўқотиш) деб атаганди.
Охир-оқибат у Украинадаги махсус операция Россия учун ўз ҳудудига қарши тажовуз олдини олишнинг ягона имконияти бўлганини маълум қилди. «Ҳамма нарса АҚШ ва унинг кичик шериклари пул тиккан неонацистлар, бандерачилар билан тўқнашув муқаррарлигидан дарак берарди. Ҳарбий инфратузилма жойлаштирилаётганини, юзлаб чет эллик маслаҳатчилар ишлай бошлаганини, НАТО мамлакатларидан энг замонавий қуроллар мунтазам етказиб берилаётганини кўрдик», — деган эди Путин.
Ўтган йил охирида Путин НАТОнинг шарққа қараб кенгаймаслиги бўйича юридик кафолатларга эришиш ҳақида мавзули музокаралар бошлашни таклиф қилганди. Президент Россияга айнан юридик кафолатлар кераклигини, чунки Ғарб мамлакатлари ўз зиммасига олган оғзаки мажбуриятларни бажармаганини айтди. Президент «Россиянинг хавфсизлик соҳасидаги асосли хавотирлари» эътиборсиз қолдирилиб келгани ва ҳалигача шундай бўлаётганини таъкидлади.
Бунга жавобан НАТО бош котиби Йенс Столтенберг Украина ва бошқа мамлакатларнинг НАТОга қўшилишга тайёрлик даражаси ҳақидаги қарорни альянс аъзолари қабул қилишини, Россия эса бу масалада вето ҳуқуқига эга эмаслигини маълум қилди. Россия, АҚШ ва НАТОнинг хавфсизлик кафолатлари масаласи бўйича музокаралари ҳам натижа келтирмади.
Изоҳ (0)