G7 davlatlari Rossiyani jahon bozoridagi ishtirokini to‘xtatishga kelishib oldi

G7 davlatlari Rossiyaga yangi sanksiyalar kiritishga va’da berdi. Bu haqda Financial Times xabar bermoqda.

G7 shuningdek, Rossiyaga nisbatan yangi jazo choralarini, jumladan, neft narxini cheklash taklifini, shuningdek, oltin eksportiga qarshi sanksiyalarni muhokama qilmoqda.  

Iqtisodiyotlari rivojlangan yetti davlatdan iborat guruh Rossiyaning asosiy sanoat manbalari, xizmatlari va texnologiyalariga kirishini yanada cheklash uchun maqsadli sanksiyalarni muvofiqlashtirish va kengaytirishini ma’lum qildi. 

Bu esa Rossiyaning jahon bozoridagi ishtirokini to‘xtatishi mumkin.

G7 shuningdek, Ukrainada sodir etilgan harbiy jinoyatlar uchun mas’ul bo‘lgan rossiyaliklarga va Ukraina donini o‘g‘irlash va eksport qilish orqali global oziq-ovqat xavfsizligiga tahdidni kuchaytirayotganlarga qarshi maqsadli sanksiyalar qo‘yishini aytdi.

Germaniyadagi sammit g‘arb yetakchilari Rossiyaning Ukrainaga bostirib kirishi oqibatida yuzaga kelgan inqirozlar bilan kurashayotgan bir paytda o‘tkazilmoqda. 

Bundan tashqari inflyatsiyaning keskin o‘sishidan tortib, jahon iqtisodiyotini og‘irlashtiruvchi energiya va oziq-ovqat ta’minoti muammolari ham yuz bermoqda.

Ukraina prezidenti Vladimir Zelenskiy G7 yetakchilarini Rossiya Ukrainadagi o‘z mavqeyini mustahkamlashni maqsad qilgani va bu qishda yangidan hujum boshlashi haqida ogohlantirdi.

NATO rasmiylari Rossiya o‘z harbiylarini yangi hujum uchun qayta to‘plash va to‘ldirish maqsadida yaqin oylar ichida urushni to‘xtatib turishini kutmoqda. 

Bunday taktika Moskvaning aprel oyidagi Kiyevga muvaffaqiyatsiz hujumidan chekinishi bilan o‘sha qo‘shin va texnikani Ukraina sharqiga qayta joylashtirish uchun kerak bo‘ladi.

G7 davlatlari Rossiyaga qarshi urushda Ukraina hukumati va xalqini qo‘llab-quvvatlashga sodiqliklarini yana bir bor tasdiqladi va Ukraina bilan qancha kerak bo‘lsa shuncha yelkadosh turishga va’da berdi.