G7 давлатлари Россияга янги санкциялар киритишга ваъда берди. Бу ҳақда Financial Times хабар бермоқда.
G7 шунингдек, Россияга нисбатан янги жазо чораларини, жумладан, нефть нархини чеклаш таклифини, шунингдек, олтин экспортига қарши санкцияларни муҳокама қилмоқда.
Иқтисодиётлари ривожланган етти давлатдан иборат гуруҳ Россиянинг асосий саноат манбалари, хизматлари ва технологияларига киришини янада чеклаш учун мақсадли санкцияларни мувофиқлаштириш ва кенгайтиришини маълум қилди.
Бу эса Россиянинг жаҳон бозоридаги иштирокини тўхтатиши мумкин.
G7 шунингдек, Украинада содир этилган ҳарбий жиноятлар учун масъул бўлган россияликларга ва Украина донини ўғирлаш ва экспорт қилиш орқали глобал озиқ-овқат хавфсизлигига таҳдидни кучайтираётганларга қарши мақсадли санкциялар қўйишини айтди.
Германиядаги саммит ғарб етакчилари Россиянинг Украинага бостириб кириши оқибатида юзага келган инқирозлар билан курашаётган бир пайтда ўтказилмоқда.
Бундан ташқари инфляциянинг кескин ўсишидан тортиб, жаҳон иқтисодиётини оғирлаштирувчи энергия ва озиқ-овқат таъминоти муаммолари ҳам юз бермоқда.
Украина президенти Владимир Зеленский G7 етакчиларини Россия Украинадаги ўз мавқейини мустаҳкамлашни мақсад қилгани ва бу қишда янгидан ҳужум бошлаши ҳақида огоҳлантирди.
НАТО расмийлари Россия ўз ҳарбийларини янги ҳужум учун қайта тўплаш ва тўлдириш мақсадида яқин ойлар ичида урушни тўхтатиб туришини кутмоқда.
Бундай тактика Москванинг апрель ойидаги Киевга муваффақиятсиз ҳужумидан чекиниши билан ўша қўшин ва техникани Украина шарқига қайта жойлаштириш учун керак бўлади.
G7 давлатлари Россияга қарши урушда Украина ҳукумати ва халқини қўллаб-қувватлашга содиқликларини яна бир бор тасдиқлади ва Украина билан қанча керак бўлса шунча елкадош туришга ваъда берди.
Изоҳ (0)