Panama prezidenti Laurentino Kortisoga miyelodisplastik sindrom deb nomlanuvchi noyob qon kasalligi tashxisi qo‘yildi. Bu haqda Reuters xabar berdi.
Amerika saraton jamiyati ma’lumotlariga ko‘ra, miyelodisplastik sindrom tananing suyak iligida sog‘lom qon hujayralari hosil bo‘lishiga ta’sir qiluvchi saraton turi hisoblanadi.
Kortisoning aytishicha, undagi kasallik xavfi o‘rtacha va u prezident sifatida kundalik vazifalarini bajarishda davom etadi.
Davlat rahbarining so‘zlariga ko‘ra, may oyida o‘tkazilgan qon tekshiruvi gemoglobin va oq qon tanachalari pasayganini ko‘rsatganidan keyin, 16-iyun kuni unga tashxis qo‘yilgan. Shifokorlar Kortisonga suyak iligi biopsiyasini tavsiya qilgan.
Tashxisga qaramay, 69 yoshli prezident shifokorlar uning ahvolini “a’lo” deb baholayotganini aytdi.
Buyuk Britaniya Milliy sog‘liqni saqlash xizmati ma’lumotlariga ko‘ra, miyelodisplastik sindromni davolash qon quyishdan tortib, kimyoterapiya yoki ildiz hujayra transplantatsiyasigacha talab qilishi mumkin. Kortiso muolaja olish-olmasligiga aniqlik kiritmagan.
Izoh (0)