Belarus Mudofaa vazirligi Ukraina bilan chegaradosh Gomel viloyati harbiy komissarliklari bilan safarbarlik mashg‘ulotlari o‘tkazilishini e’lon qildi.
Boshqarma xabarida ta’kidlanishicha, o‘quv mashg‘ulotlarini o‘tkazishdan maqsad harbiy komissarliklarning zaxiradagi askarlarni safarbar etish bo‘yicha vazifalarni bajarishga tayyorligini tekshirishdan iborat. O‘quv mashg‘ulotlari davomida zaxiradagilar safarbarlik to‘g‘risida xabardor qilinadi va harbiy qismlarga jo‘natish punktlariga chaqiriladi.
Belarus Mudofaa vazirligi bunday mashg‘ulotlar har yili o‘tkazilishini, oxirgi marta Mogilev viloyatida o‘tkazilganini ta’kidladi. Avvalgi o‘quv mashg‘ulotlaridan farqli o‘laroq, bu safar safarbar etilganlar harbiy qismlarga yuborilmaydi, otryadlar tuzilgandan so‘ng barcha zaxiradagilar uylariga jo‘natiladi.
Shuningdek, mashg‘ulotlarda haqiqatga yaqin muhitni yaratish maqsadida maxsus operatsiya kuchlari bo‘linmalarining ishtiroki rejalashtirilgani xabar qilingan.
Iyun oyi o‘rtalarida Belarusda “dinamik o‘zgaruvchan muhit”da vazifalarni bajarish uchun logistika bo‘linmalarini tayyorlash bo‘yicha qo‘mondonlik-shtab mashqlari o‘tkazilgan.
Avvalroq Belarus Qurolli kuchlarida kutilmagan tekshiruv boshlangan edi, uning maqsadi shaxsiy tarkibning kutilmagan inqirozlarga javob berishga tayyorligini baholash edi. Mudofaa vazirligining xabar berishicha, iyun oyi boshida ushbu tekshiruvning uchinchi bosqichi bo‘lib o‘tdi.
Izoh (0)